ބަޙުރު

އެއްދުވަހަކު، ހެކިވެރިއެއްގެ ގޮތުގައި މީހަކު ޝަރީޢަތަށް ހާޒިރުކުރެވުނެވެ. އެމީހާއާ ޤާޟީ ސުވާލުކުރިއެވެ.
"ތިބާ ކުރަނީ ކޮން މަސައްކަތެއް ހެއްޔެވެ؟"

އެމީހާ ބުންޏެވެ.
"ތިމަންނާއަކީ، ގޭގެއަށް ގޮސް ކުދިންނަށް ކިޔަވާދޭ މީހަކީމެވެ."

ޤާޟީ ބުންޏެވެ.
"ތިބާގެ ހެކިބަސް ޝަރީޢަތަށް ޤަބޫލެއް ނުކުރެވޭނެއެވެ."

އެމީހާ ބުންޏެވެ.
"އެއީ ކީއްވެ ހެއްޔެވެ؟"

ޤާޟީ ބުންޏެވެ.
"އެއީ، ތިބާ ކީރިތި ޤުރުއާން ކިޔަވާދިނުމަށްޓަކައި އުޖޫރައެއް ނަގާތީއެވެ."

ޤާޟީ މިހެން ބުނުމުން، އެމީހާ ބުންޏެވެ.
"އެހެންކަމަށްވަނީނަމަ، ޤާޟީ ކުރާ ޝަރީޢަތްތައް ވެސް ޞައްޙައެއް ނުވާނެއެވެ."

ޤާޟީ ބުންޏެވެ.
"އެއީ ކީއްވެ ހެއްޔެވެ؟"

އެމީހާ ބުންޏެވެ.
"އެއީ، ޢަދުލު އިންޞާފު ޤާއިމުކުރުމުގެ ބަދަލުގައި، ޤާޟީ އުޖޫރައެއް ލިބިގަންނާތީއެވެ!"

އެހިނދު ޤާޟީ ބުންޏެވެ.
"ތިބާގެ ހެކިބަސް ޝަރީޢަތަށް ޤަބޫލުކުރެވޭނެއެވެ. އަވަހަށް ހެކިބަސް ދޭށެވެ!"