ބަޙުރު

އެއްދުވަހަކު ޙިކުމަތްތެރިއެއްގެ އަރިއަހަށް މީހަކު ސުވާލެއް ހުށަހެޅިއެވެ.
"ސާހިބާއެވެ! މީހަކަށް އެންމެ ބޮޑަށް ފައިދާކުރާނީ ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"އޭނާގެ ސަލާމަތް ބުއްދިއެވެ."
އެމީހާ ބުންޏެވެ.
"ސަލާމަތް ބުއްދިއެއް ނެތްނަމަ، ދެން ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"އޭނާގެ ކިބައިގައިވާ އުނިކަންކަން ފޮރުވައިދޭނެ އިޚުލާޞްތެރި އަޚުންނެވެ."
އެމީހާ ބުންޏެވެ.
"އިޚުލާޞްތެރި އަޚުން ނެތްނަމަ، ދެން ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"މީސްތަކުން އޭނާއަށް މުހުތާދުވާނެ ފައިސާއާއި މުދަލެވެ."
އެމީހާ ބުންޏެވެ.
"މީސްތަކުން އޭނާއަށް މުހުތާދުވާނެ މުދަލާއި ފައިސާ ނެތްނަމަ، ދެން ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"މީސްތަކުން އޭނާއަށް ކަމޭހިތާނޭ ފަދަ އަޚުލާޤެވެ."
އެމީހާ ބުންޏެވެ.
"އޭނާގެ ކިބައިގައި އެފަދަ އަޚުލާޤު ނެތްނަމަ، ދެން ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"ހަމަހިމޭންކަމެވެ."
އެމީހާ ބުންޏެވެ.
"އޭނާގެ ކިބައިގައި ހަމަހިމޭންކަން ނެތްނަމަ، ދެން ކޮން އެއްޗަކުންތޯއެވެ؟"
ޙިކުމަތްތެރިޔާ ވިދާޅުވިއެވެ.
"އެހެންކަމަށް ވަނީނަމަ، އޭނާއަށް އެންމެ ފައިދާހުރި އެއްޗަކީ، އަޖަލެވެ. އެއީ، އޭނާގެ ސުންޕާކަމުން އޭނާއާއި، އެހެން މީހުންނާއި، މުޖުތަމަޢު ސަލާމަތްވާނެތީއެވެ."