ޓީޗަރުންގެ ދުވަހުގެ މުނާސަބަތުގައި
ކިލާހަށް އިރެއްހެން އައިސް ވަންނަނީ،
ކެލާހުވަނދު ވަސްމީރުކަން ފަތުރަނީ.
އިރުން އިރުވަރަށް
ދަންމަރެއްކަމު ވަނީ،
ދިރުން ހިތްތަކަށް ދޭ ދަރުސް އޮއްސަނީ.
ފިލާވަޅު އެތައް
މަޞްދަރުން ދައްކަނީ،
ބިލާދަރު ކަމަށް ދަރިވަރުންނަށް ވަނީ.
ކިލާކަން ދަރިން
ހިތްތަކުން ފިލުވަނީ،
އިލާހީގެ ރަޙްމަތް ކަމަށް އެނގިވަނީ.
ޢުލޫމުން ދިރުން
ބުއްދިއަށް ގެނުވަނީ،
ސުލޫކުގެ ތެރޭ ޚުލްޤު ހެޔޮ އިންދަނީ.
އުހާއި ތިރި
ތަފާތުން ތަފާސްކޮށްލަނީ،
ޟުޙާ ހެންމެ އަލި މޫނުތައް ކޮށްލަނީ.
ބަޔާންކޮށް
ޚިޔާލާތު ފަހިކޮށްލަނީ،
ވަޔާއެކު އަމާނާތް އަދާކޮށްލަނީ.
ޖަވާހިރުގެ ޔާޤޫތު
ދުލުން ފަރިވަނީ،
ޖަވާބުގެ މުތީތައް ވެދުންކޮށްލަނީ.
ވެދާ ކޮންމެ
ކައްޗެއްމެ ތެދުކޮށްލަނީ،
ނިދާތައްމެ ކެއްޗަށް އުހަށް އުފުލަނީ.
ފުނޫނުގެ ބަގީޗާ
މަލުން ކުރަހަނީ،
ކުނޫޒޭ ޢުލޫމުން ގެނެސް ހުޅުވަނީ.
އެއަށް
ފެންބޮވައިގެން ދަރިންތައް ވަނީ،
އެއަށް ފަންސުރާއި ފޮތް ފަޚުރުވެރިވަނީ.
މަލުން މާ
ގަތައި ހާރުތައް އަމުނަނީ،
އަލުން ހެޔޮ ދުޢާ ޓީޗަރަށް ކޮށްލަނީ.