ބަޙުރު

ތިރީގައި މިވަނީ ރަސޫލުﷲ ޞައްލަﷲ ޢަލައިހި ވަސައްލަމަ މިޢުރާޖުއަރައިވަޑައިގެންނެވި ހިލަކޮޅާ ބެހޭ ބައެއް މަޢުލޫމާތެވެ.

އެ ހިލަކޮޅަށް ޢަރަބި ބަހުން ކިޔަނީ "އައްޞަޚްރަތުލް މުޝައްރަފާ" އެވެ. އެއީ ވަކި ބައްޓަމަކަށް ބައްޓަންވެފައިވާނުވާ ޤުދުރަތީ ހިލަކޮޅެކެވެ.

ގާތްގަނޑަކަށް، އޭގެ ދިގުމިނަކީ 18 މީޓަރެވެ. އޭގެ ފުޅާމިނަކީ 13 މީޓަރެވެ. އުސްމިނަކީ 2 މީޓަރެވެ.

އެ ހިލަކޮޅުގައި އާދަޔާ ޚިލާފު ޚާއްޞަ ކަމެއް ފެންނާކަށެއް ނެތެވެ. އެ ހިލަކޮޅަކީ އެއްވެސް ތަނެއްގައި ނުޖެހި އޮންނަ ހިލަކޮޅެއް ކަމަށް ދެކެވޭ ވާހަކައަކީ ތެދު ވާހަކައެއް ނޫނެވެ.

އެ ހިލަކޮޅަކީ ބަނޫއިސްރާއީލު ބާގައިގެ ނަބީބޭކަލުންގެ ޤިބުލަ ކަމުގައި ވިއެވެ.

ރަސޫލުﷲ ޞައްލަﷲ ޢަލައިހި ވަސައްލަމަ މިޢުރާޖުއަރައިވަޑައިގެންނެވީ އެ ހިލަކޮޅުގެ މަތިންނެވެ.

މިޢުރާޖުއަރާވަޑައިގަތުމަކީ، (އިތުރުއެކަލޭގެފާނު މައްކާގެ ޙަރަމްފުޅުން މަސްޖިދުލް އަޤުޞާއަށް ކުރެއްވި އިސްރާގެ ދަތުރުފުޅަށްފަހު) މަސްޖިދުލްއަޤުޞާއިން މަލަކޫތީ ޢާލަމަށް ދަތުރުފުޅުކުރެއްވުމެވެ.

ޤުއްބަތުއްޞަޚްރާ ބިނާކުރެވިފައިވަނީ އެ މާތް ހިލަކޮޅުގެ މަތީގައެވެ.

ޤުއްބަތުއްޞަޚްރާ ބިނާކުރެއްވީ ޢަބްދުލްމަލިކު ބްނު މަރްވާން (26-86 ހ.) (646-705 މ.) އެވެ. އެއީ މަސްޖިދުލްއަޤުޞާ ނުވަތަ ބައިތުލްމަޤުދިސްގެ މެދުގައިވާ ރީތި ޢިމާރާތެވެ. އެތަނުގައިވާ ރަންކުލައިގެ ރީތި ޤުއްބުގެ ސަބަބުން އެތަން ވަރަށް ފަސޭހައިން ފާހަގަކުރެވެއެވެ. އެތަން ބިނާކުރެވުނީ، ރަސޫލުﷲ ޞައްލަﷲ ޢަލައިހި ވަސައްލަމަ މިޢުރާޖުއަރައިވަޑައިގެންނެވި މާތް ހިލަކޮޅު ރައްކާތެރިކުރުމަށްޓަކައެވެ.

މަޞްދަރު

ޤިއްޞަތުލް އިސްލާމް