ބަޙުރު

2022 ވަނަ އަހަރު ޑިސެންބަރު މަހު 14 އިން 15 އަށް އިސްކަންދަރު ސްކޫލްގައި ބޭއްވި (STEM FAIR 2022) ގައި ދަރިވަރުން ވަނީ ވަރަށް ގިނަ ތަކެތި ހުށަހަޅައިދީފައެވެ. އޭގެ ތެރެއިން ފާހަގަކޮށްލެވުނު އެކައްޗަކީ ގްރޭޑް 6 (ޑީ) ގެ ދަރިވަރުންގެ ޓީމަކުން ހުށަހަޅައިދިން ފައްވާރާއެކެވެ. އެ ފައްވާރާއަށް ކިޔާ ޢިލްމީ ނަމަކީ، "ހެރޮންގެ ފައްވާރާ" އެވެ. އެ ހުށަހެޅި ދަރިވަރުން އެއަށް ދީފައިވާ ނަމަކީ (WATER FOUNTAIN) އެވެ. ސައިންސް ފެއަރއަށް ޒިޔާރަތްކުރި ގިނަ ބަޔެއްގެ ނަޒަރު ވަނީ، އެ ފައްވާރާއަށް ހުއްޓިފައެވެ. ގިނަ ބަޔަކު އެ ފައްވާރާ ބެލިއެވެ. ގިނަ ބަޔެއްގެ ސަމާލުކަން އެ ފައްވާރާއަށް ހުއްޓުނީ ކީއްވެ ހެއްޔެވެ؟ އެއީ އޭގެ އަމިއްލަ ޒާތުގައި މަސައްކަތްކުރާ އެއްޗެއް ކަމުގައި ވާތީއެވެ. އެ ހިންގުމަށްޓަކައި އިތުރު ހަކަތައެއް ބޭނުންނުވާތީއެވެ.

ފައްވާރާ ހުށަހަޅައިދިނުމަށް ދަރިވަރުން ތައްޔާރުވަނީ

ފައްވާރާ ހުށަހަޅައިދިން ދަރިވަރުންގެ ޓީމުގައި ހިމެނެނީ ލަޔާނާ އާއި، މިލީ އާއި، ޔަޒާން އާއި، ފަނަން އެވެ. އެ ދަރިވަރުންނަށް އެކަމުގައި އިރުޝާދު ދެއްވަން ހުންނެވީ، އެ ދަރިވަރުންގެ ކްލާސްޓީޗަރު ޙަސަން އަޙްމަދު އެވެ. އޭނާގެ އިޝްރާފުގެ ދަށުން ދަރިވަރުން އުފެއްދި ފައްވާރާ، އެ ކުދިން ޝަރަޙަކޮށްދެމުން ގެންދިޔައީ އިނގިރޭސި ބަހާއި ދިވެހި ބަހުންނެވެ. އެކަމަށްޓަކައި އެ ދަރިވަރުން ވަނީ އެ ފައްވާރާގެ ދެ ނަކަލެއް ބޭނުންކޮށްފައެވެ. އެއް ނަކަލު ބޭނުންކުރީ ފައްވާރާއިން ފެން އަރާ ގޮތް، ޢަމަލީ ގޮތުން ދައްކައިދިނުމަށެވެ. އަނެއް ނަކަލު ބޭނުންކުރީ އޭގެ ތެރޭގައި ހޮޅިތައް ގުޅާފައިވާ ގޮތާއި، އެ ހޮޅިތަކުން ފެން ދައުރުކުރާ ގޮތް ޝަރަޙަކޮށްދިނުމަށްޓަކައެވެ. ފައްވާރާ ޝަރަޙަކޮށްދޭ ލިޔުމާއި ކުރެހުން ހިމެނޭ ބޯޑެއް ވެސް ދަރިވަރުން ހަދާފައި ވެއެވެ.

ތިރީގައި މިވަނީ ގްރޭޑް ހަޔެއް (ޑީ) ގެ ދަރިވަރުން ހުށަހެޅި ފައްވާރާއާ ބެހޭ ބައެއް މަޢުލޫމާތެވެ.

ސައިންސް ފެއަރ އަށް ޒިޔާރަތްކުރި މެހުމާނުންތަކެއް، ފައްވާރާއިން ފެން އަރާ ގޮތް ބަލައިލަނީ

ހެރޮންގެ ފައްވާރާ

ހެރޮންގެ ފައްވާރާ (Heron's fountain) އަކީ އިހުޒަމާނުގެ ސައިންޓިސްޓަކު އީޖާދުކުރި އާލަތެކެވެ. އޭނާގެ ނަމަކީ ހެރޮން (Heron) އެވެ. ނުވަތަ ހީރޯ (Hero) އެވެ. އޭނާއަށް އިސްކަންދަރިއްޔާގެ ހީރޯ (Hero of Alexandria) ވެސް ކިޔައެވެ. އޭނާއަކީ ހިސާބު ޢިލްމުވެރިއެކެވެ. ފިޒިޒިސްޓެކެވެ. އޭނާ ދުނިޔޭގައި އުޅެފައިވަނީ މީލާދީ ސަނަތުން ފުރަތަމަ ޤަރުނުގެ ތެރޭގައެވެ. އޭނާ އުފަންވީ މީލާދީ ސަނަތުން 10 ވަނަ އަހަރު، މިޞްރުގެ އިސްކަންދަރިއްޔާގައެވެ. އޭނާ ނިޔާވީ މީލާދީ ސަނަތުން 70 ވަނަ އަހަރުގައެވެ. މި ތާރީޚުތަކަށް ބަލާއިރު، އޭނާ ދުނިޔޭގައި އުޅެފައިވަނީ 60 އަހަރު ކަން އެނގެއެވެ. އޭނާ މަޝްހޫރުވެފައިވަނީ، ގޭހާއި ފެނާ ބެހޭ ގޮތުން އޭނާ ކޮށްފައިވާ ދިރާސާތަކުންނެވެ. އޭނާ އީޖާދުކުރި އެންމެ މުހިންމު އެކައްޗަކީ، އޭނާގެ ނަމުން ނަންދެވިފައިވާ ފައްވާރާއެވެ. މިޒަމާނުގައި ފިޒިކްސްގެ ބައެއް ފިލާވަޅުތަކުގައި، ވަޔާއި ފެނުގެ ޕްރެޝަރު އުނގަންނައިދިނުމަށްޓަކައި އެ ފައްވާރާ ބޭނުންކުރެވެއެވެ.

ކަނާތްފަރާތުގައި: ކްލާސްޓީޗަރު ޙަސަން އަޙްމަދު
މެދުގައި: ފައްވާރާގެ ނަކަލެއްގެ ފޮޓޯއެއް
ވާތްފަރާތުގައި: ފައްވާރާ ހުށަހެޅި ބައެއް ދަރިވަރުން

ފައްވާރާގެ ބައިތައް

ހެރޮންގެ ފައްވާރާ އެކުލެވިގެންވަނީ މައިގަނޑު ތިން ބަޔަކާއި ތިން ހޮޅިންނެވެ.

މައިގަނޑު ތިން ބަޔަކީ:

1. ތިރީ ބައި: މިއީ ވައިގެ ޕްރެޝަރު އުފައްދާ ބަޔެވެ.
2. މެދު ބައި: މިއީ ފެން އަރުވާ ބަޔެވެ.
3. މަތީ ބައި: މިއީ ފެން އޮހޮރޭ ބަޔެވެ.

ފައްވާރާގައި ހިމެނޭ ތިން ހޮޅީގެ އިތުރު ތަފުޞީލު ތިރީގައި މިވަނިއެވެ.

1. ފުރަތަމަ ހޮޅި: މިއީ، ތިރީ ބައިގެ ތިރިން ފެށިގެން މަތީ ބަޔާ ހަމައަށް ވާޞިލުވާ ހޮޅިއެކެވެ. މި ހޮޅިގެ ބޭނުމަކީ ތިރީ ބަޔަށް ފެން އެޅުމެވެ.
2. ދެވަނަ ހޮޅި: މިއީ ތިރީ ބައިގެ މަތީ ކައިރިއާ ހިސާބުން ފެށިގެން މެދު ބައިގެ މައްޗާ ހަމައަށް ވާޞިލުވާ ހޮޅިއެކެވެ. މި ހޮޅީގެ ބޭނުމަކީ ތިރީ ބައިގައި އުފައްދާ ވައިގެ ޕްރެޝަރު، މެދު ބަޔަށް ނަޤުލުކުރުމެވެ.
3. ތިންވަނަ ހޮޅި: މިއީ މެދު ބައިގެ ތިރީ ކައިރިއާ ހިސާބުން ފެށިގެން މަތީ ބައިގެ ތެރެއަށް އުފުލާލެވިފައިވާ ހޮޅިއެކެވެ. މި ހޮޅީގެ ބޭނުމަކީ މެދު ބައިގެ ތެރެއިން މަތީ ބަޔަށް ފެން އެރުވުމެވެ. ފައްވާރާގައިވާ ފެން އަރާ ހޮޅިއަކީ މި ހޮޅިއެވެ.

ފައްވާރާގެ ތިރީ ބަޔާއި މެދު ބައި ހުންނަންވާނީ ރަނގަޅަށް ވައި ބަންދުކުރެވިފައެވެ. ކިތަންމެ ކުޑަކޮށް ލީކުވިޔަސް ފައްވާރާ ރަނގަޅަށް މަސައްކަތެއް ނުކުރާނެއެވެ.

ފައްވާރާގެ މަތީ ބައި މުޅިން ވައި ބަންދުވާނެހެން ހަދާފައި ހުއްޓަސް، ފައްވާރާ މަސައްކަތްކުރާނެއެވެ. ނަމަވެސް މަތީ ބައިގެ ވައި ބަންދުކުރުމަކީ ލާޒިމުކަމެއް ނޫނެވެ.

ފައްވާރާ ހެދުމަށްޓަކައި ބޭނުންކުރުން ރަނގަޅީ ރަނގަޅަށް ވައި ބަންދުވާނެހެން ހަދާފައިވާ ޕްލާސްޓިކު ފުޅިއެވެ. ފެން ހުސްކުރި ފުޅިއަކީ ބޭނުންކުރެވިދާނެ އެއްޗެކެވެ. އެފަދަ އެހެން ފުޅި ވެސް ބޭނުންކުރެވިދާނެއެވެ. ނަމަވެސް ފުއްޕާ ހަން ފަދަ ތަކެތި ބޭނުމެއް ނުކުރެވޭނެއެވެ.

ފައްވާރާ ހިންގައިލުމުގެ ފިޔަވަޅުތައް

ފައްވާރާގެ މަސައްކަތްކުރާ ގޮތް

ފެން އަރުވާ ވަޑާމެއްގެ ސިފައިގައި، ހެރޮންގެ ފައްވާރާއިން ފެން އެރުވުމަށްޓަކައި ކަންކުރަންޖެހޭ ގޮތް ތިރީގައި މިވަނީއެވެ.

1. އޭގެ ތިރީ ބައި ފުރެންދެން މަތީ ބަޔަށް ފެން އެޅުން
2. ތިރީ ބަޔަށް އެޅި ފެން، މެދު ބަޔަށް ފޮނުވާލުމަށްޓަކައި އެކޮޅުކޮޅުން ޖަހާލުން
3. ތިރީ ބައިގައި ވާ ފެން، މެދު ބަޔަށް ފޮނުވައިލުމަށްފަހު، ފައްވާރާ ތަނެއްގައި ބެހެއްޓުން
4. އޭގެ މަތީ ބަޔަށް ފެންފޮދެއް އަޅައިލުން

މި ފިޔަވަޅުތައް ފުރިހަމަވުމުން، އޭގެ މަތީ ބައިގައި، މައްޗަށް ނަގާފައިވާ ހޮޅިން ފެން އަރަން ފަށާނެއެވެ. މި ފައްވާރާއަކީ ދާއިމީ ގޮތެއްގައި ފެން އަރައަރައި ހުންނަ އެއްޗެއް ނޫނެވެ. މިއިން ފެން އަރާނީ މެދު ބައިގައިވާ ފެން ހުސްވަންދެނެވެ. އެ ބައިގައިވާ ފެން ހުސްވުމުން، އަލުން ފެން އެރުވުމަށްޓަކައި، އިސްވެދިޔަ ފިޔަވަޅުތަކުގެ ދެވަނަ ފިޔަވަޅުން ފެށިގެން ކުރިއަށް ގެންދެވިދާނެއެވެ.

ނިންމުން

އިސްކަންދަރު ސްކޫލްގެ ގްރޭޑް 6 (ޑީ) ގެ ދަރިވަރުންގެ ޓީމަކުން ހުށަހަޅައިދިން ފައްވާރާއަކީ، ދެހާސް އަހަރަށްވުރެ ގިނަ ދުވަސް ވެފައިވާ އީޖާދެކެވެ. މިއަދާ ހަމައަށް ވެސް އެ އީޖާދު ބަލެއްނުވެއެވެ. އެހެނީ، މިއަދާ ހަމައަށް ވެސް އޭގެ ބޭނުންކުރެވެއެވެ. އެ ފައްވާރާ ދިރާސާކޮށްގެން، ވަރަށް ގިނަ ކަންކަން ދަރިވަރުންނަށް އޮޅުންފިލައެވެ. ފެނާއި ވަޔާއި ގޭހުގެ ޠަބީޢަތުގައިވާ ބައެއް ކަންކަން އެއިން އޮޅުންފިލައެވެ. އަދި ބިމުގެ އަޑީގައިވާ ފަޝަލަތަކުގެ ތެރޭގައި ހިނގާ ކަންކަން ދެނެގަތުމަށްޓަކައި ވެސް އޭގެ ބޭނުންކުރެވެއެވެ.

2022 ވަނަ އަހަރު ޑިސެންބަރު މަހު 14 އިން 15 އަށް، އިސްކަންދަރު ސްކޫލުން ބޭއްވި ސައިންސް ފެއަރ އިން، އެ ސްކޫލްގެ ދަރިވަރުންނަށް ގިނަގުނަ ފައިދާތަކެއް ލިބިގެންދިޔައެވެ. އެ ފެއަށް އަށް ދަރިވަރުން ހުށަހަޅައިދިން އީޖާދުތަކަކީ، އެ ކުދިންގެ ވިސްނުމާއި ފިކުރު ތަނަވަސްކޮށްދިން އެއްޗެއް ކަމާމެދަކު ޝައްކެއް ނެތެވެ. އެ ފެއަރ އިން ފެނިގެންދިޔަ އެންމެ އުޖާލާ އެއް ކަމަކީ، ޓީޗަރުންނާއި ބެލެނިވެރިންގެ މެދުގައިވާ ބަދަހިގުޅުމެވެ. ދަރިވަރުންގެ އުފެއްދުންތަކާއި އީޖާދުތަކުގެ ފަހަތުގައިވާ ސިއްރަކީ ވެސް އެއީއެވެ.

އަޅުގަނޑުގެ ދުޢާއަކީ، އިސްކަންދަރު ސްކޫލަށާއި އެ ސްކޫލްގެ ދަރިވަރުންނަށް އިތުރު ކުރިއެރުމާއި ކާމިޔާބު މިންވަރުކުރެއްވުމެވެ. މާތްﷲ މި ދުޢާ އިޖާބަކުރައްވާށިއެވެ! އާމީން.

މަޞްދަރު

އިސްކަންދަރު ސްކޫލްގެ ސައިންސް ފެއަރ އާއި އިތުރު މަޞްދަރުތައް