ބަޙުރު

ޢަބްސް ވަންހައިގެ މަހުޖަނަކު، އޭނާގެ ޖަމަލެއް ގެއްލިގެން އެ ޖަމަލު ހޯދުމަށްޓަކައި ނިކުތެވެ. ޖަމަލުގެ ފިޔަވަޅުތައް ބަލަމުން، ޖަމަލު ދިޔަ މަގުން އޭނާ ދިޔައެވެ. ޖަމަލު ފެންނާނެ ކަމުގެ އުންމީދުގައެވެ. އެ ކަމުގައި އޭނާ ތިން ރޭ ތިން ދުވާ ހޭދަކުރިއެވެ. އޭނާއަކީ ވަރަށް މުއްސަނދި މަހުޖަނެއް ކަމުގައި ވިއެވެ. އޭނާގެ މިލްމުގައި ވަރަށް ގިނަ މުދަލާއި ޖަމަލާއި ގެރިއާއި ބަކަރި ވެސް ވިއެވެ. އަދި އޭނާއަށް ވަރަށް ގިނަ ފިރިހެން ދަރިންނާއި އަންހެން ދަރިން ވެސް ލިބިފައި ވިއެވެ. އޭނާގެ މި ހުރިހައި މުދަލަކާއި އަނބި ދަރީން ވަނީ އޭނާގެ މިލްކުގައިވާ ވަރަށް ބޮޑު ބިމެއްގައެވެ. އެ ބިމުގައި އޭނާގެ އަނބި ދަރީންނަށް ނުހަނު ރީތި ގެދޮރު ހަދާފައި ވެއެވެ. އެ ބިން ވަނީ، ޢަބްސް ވަންހައިގެ މީހުންގެ ސަހަރުގެތެރޭގައިވާ ވާދީއެއްގެ އައްސޭރީގައެވެ. އެ ތާނގައި ނުހަނު އުފަލާއި އަރާމުގައި އެ މީހުން ދިރިއުޅެމުންދިޔައިރު، އެ މީހުންނާއި އެ މީހުންނަށް ލިބިފައިވާ ނިޢުމަތްތައް ފަނާކޮށްލާނޭ މުޞީބާތެއް ދުވަހަކުވެސް ކުރިމަތިވެދާނޭ ކަމަކަށް އެމީހުންނަކު ހިޔެއްނުކުރެއެވެ.

މަހުޖަނު އޭނާގެ ޖަމަލު ހޯދަން ނިކުތްފަހުން އެއްރެއަކު އޭނާގެ އަނބި ދަރީން ނިދާފައި ތިއްބާ، ވަރުގަދަ ޠޫފާނެއް އައިސް، ވަރަށް ބޯކޮށް ވާރޭވެހުނެވެ. އެ ކަމުގެ ސަބަބުން ވާދީ ތެރޭގައި ވަރުގަދަ ސައިލެއް އުފެދުނެވެ. އެ ސައިލު ވަރަށް ބާރަށް ދެމެމުންދިޔައެވެ. ފަރުބަދަތަކުގެ ބޮޑެތި ހިލަތައް ވެސް އޭގެ ވަރުގަދަ އޮއިވަރުގައި ދަމަމުން ގެންދިޔައީ، ކުދިކުދި ވެލިފުއްތަކެއް ހެންނެވެ. ކުއްލިއަކަށް އައި އެ ޠޫފާނުގެ ތެރޭގައި، މަހުޖަނުގެ ގެދޮރާއި މުދަލާއި އަނބި ދަރީންނާއި އޭނާގެ މިލްކުގައިވާ ހުރިހައި އެއްޗެއް ހަލާކުވެގެންދިޔައެވެ. އިއްޔެ އެ މީހުން އުފަލާއި އަރާމުގައި ދިރިއުޅުނު ބިމަކީ، ދުވަހަކު ވެސް ބަޔަކު ދިރިއުޅެފައިނުވާ ފަދަ ފަޅު ތަނަކަށް ވެގެންދިޔައެވެ.

މަހުޖަނު އޭނާ ހޯދަންދިޔަ ޖަމަލާއިގެން އޭނާގެ ގެދޮރަށް އެނބުރި ދިޔައިރު، މުޅި އެ ސަރަޙައްދު ވަނީ ޚަރާބުވެފައެވެ. އެ ތަން ވަނީ ފަޅު ސަރަޙައްދަކަށް ބަދަލުވެފައެވެ. އެއީ ދުވަހަކު ވެސް ބަޔަކު ދިރިއުޅުނު ސަރަޙައްދެއް ކަމުގެ ހިލަމެއް ވެސް އެތާކު ނެތެވެ. މަހުޖަނުގެ އަނބި ދަރީންނާއި މުދަލާއި ގެދޮރާއި އޭނާގެ މިލްކިއްޔާތުގެ ތެރެއިން އެއްވެސް އެއްޗެއް އެ ތަނުން ނުފެނުމުން، އޭނާ ވަރަށް ބޮޑަށް ދެރަވިއެވެ. ލައިގެން ހުރި ފޭރާން ފިޔަވައި، އުނުއޮރިޔާން ނިވާކުރާނެ އެއްޗެއް ވެސް އޭނާގެ އަތަކު ނެތެވެ. އޭނާއަށް ކުރިމަތިވި މި ބޮޑު މުޞީބާތުގެ ހިތާމައިގައި ގޮތް ހުސްވެފައި ހުއްޓާ، މުޞީބާތުގެ މައްޗަށް މުޞީބާތް އިތުރުވިއެވެ. އޭނާގެ ޖަމަލު އެސޮރުގެ ނިގުލުން ޖެހި ވަރުގަދަ އެތިފަހަރަކުން އޭނާގެ ދެލޯ ކަނުކޮށްލުމުންނެވެ!

ދެންފަހެ، އޭނާ އެ ފަޅު ތާނގައި، ދާނެ ނުދާނެ ވަކި ތަނެއް ނޭނގި ހުރެ، މާތް ﷲ ގެ ރަޙުމަތްފުޅަށް އުންމީދުކުރިއެވެ. އަދި ކޮންމެވެސް މީހަކު އޭނާއަށް އެހީތެރިކަމެއް ފޯރުކޮށްދިނުން އެދި އާދޭހުގެ އަޑު އުފުލިއެވެ. އޭނާ އެ ޙާލުގައި ހުއްޓައި، ދަތުރުކުރަމުންދިޔަ ޢައުރާބީއަކަށް ފެނުނެވެ. (ޢައުރާބީ އަކީ، ޢަރަބީންގެ ރަށްފުށު މީހާއެވެ.) ދެން އެ އަޢުރާބީ، އޭނާ ގޮވައިގެން ދިމަޝްޤަށް ދިޔައެވެ. އޭނާއަށް ބައިތުލްމާލުން މަދަދު ހޯދައިދިނުމުގެ ނިޔަތުގައި، އޭރު ހުންނެވި ޚަލީފާ އަލްވަލީދު ބްނު ޢަބްދުލްމަލިކުގެ އަރިއަހަށް އޭނާ ގޮވައިގެންދިޔައެވެ. އަދި އޭނާއަށާއި އޭނާގެ އަހުލުންނަށް ކުރިމަތިވި މުޞީބާތުގެ ވާހަކަ، ޚަލީފާގެ އަރިއަހުގައި ދެންނެވިއެވެ. އެހިނދު، ޚަލީފާ އޭނާއާމެދު ސަހަރޯވެރިވެވަޑައިގެން އެއްސެވިއެވެ.

"ތިޔަ ކުރިމަތިވި މުޞީބާތުން ނަޖާވިއިރު، ތިބާގެ ޙާލަކީ ކޮބައިހެއްޔެވެ؟"

އޭނާ ދެންނެވިއެވެ.

"ތިމަންގެ ޙާލު ރަނގަޅެވެ! މާތް ﷲ ގެ މިންވަރުފުޅާމެދު ރުހިގެން ވަމެވެ!"

ޙާލުގައި ޖެހިފައިވާ މީހާ މިހެން ދެންނެވުމުން، މާތް ﷲ ގެ މިންވަރުފުޅަށާއި، އެކަލާނގެ ރަޙުމަތްފުޅަށް އޭނާ އީމާންވާ ވަރުގެ ބޮޑުކަން، ޚަލީފާއަށް އެނގިވަޑައިގަތެވެ. ފުރިހަމަ މުސްލިމުންގެ ގޮތަކީ، އެއީއެވެ. ޚަލީފާގެ އަރިއަހުގައި އޭނާ ދެންނެވި އެ ބަހަކީ، ކަންކަމާމެދު ފިކުރުބޮޑުވާ މީހުންނަށް އޮތް ޢިބްރަތެކެވެ. ހާސްވާ މީހުންނަށް އޮތް ޙިކުމަތެކެވެ. މާޔޫސްވާ މީހުންނަށް އޮތް ނަސޭހަތެކެވެ. ހުރިހައި ކަމެއްމެ ހިނގަމުންދާނީ، ކަށަކުޅަދުންވަންތަ މާތް ﷲ މިންވަރުކުރައްވައި އިރާދަކުރައްވާފައިވާ ގޮތަށެވެ. ތިމާގެ ޙާލަތާމެދު ހިތްހަމަޖެހުން ޙާޞިލުކުރުމަށްޓަކައި އީމާންވާންޖެހޭ ޙަޤީޤަތަކީ އެއީއެވެ.