ބަޙުރު

2022 ވަނަ އަހަރު ޑިސެންބަރު މަހު 14 އިން 15 އަށް އިސްކަންދަރު ސްކޫލްގައި ބޭއްވި (STEM FAIR 2022) ގައި ދަރިވަރުން ވަނީ ވަރަށް ގިނަ ތަކެތި ހުށަހަޅައިދީފައެވެ. އޭގެތެރޭގައި ދަރިވަރުން އަލަށް އީޖާދުކޮށްފައިވާ ތަކެއްޗާއި، ކުރީގެ އީޖާދުތައް ޒަމާނީ ގިއުގަނޑެއްގެ ތެރޭގައި ހުށަހަޅައިދީފައިވާކަން ފާހަގަކުރެވުނެވެ. ފެއަރ ބަލާލުމަށްޓަކައި ކުރި ޒިޔާރަތުގައި ފާހަގަކުރެވުނު އެންމެ ރަނގަޅު އީޖާދަކީ ކަދުރުން އޮށް ނަގާ އާލަތެކެވެ. އެ އާލަތް އުފެއްދި ދަރިވަރު އެއަށް ދީފައިވާ ނަމަކީ (Date Pitting Machine) އެވެ. ތިރީގައި މިވަނީ އެ ދަރިވަރުގެ ބައެއް މަޢުލޫމާތެވެ.

ނަން: ޙުސައިން ޒައްޔާން މުޙައްމަދު ފަރްޙަތު
ކްލާސް: 7 ޑީ
ސްކޫލް: އިސްކަންދަރު ސްކޫލް

ނޯޓު:
ފަހުން އެނގުނު ގޮތުގައި މި އާލަތް އުފެއްދީ ޓީމަކުންނެވެ. އެ ޓީމުގައި ހިމެނޭ ދަރިވަރުންނަކީ: ޙުސައިން ޒައްޔާން މުޙައްމަދު ފަރުހަތު އާއި، އަހުމަދު ރަޔާން ބަޝީރު އާއި، އަހުމަދު ބާސިޠު އެވެ.

އާލަތުގެ މުހިންމުކަން

ޙުސައިން ޒައްޔާން އުފެއްދި އާލަތް ތައްޔާރުކޮށްފައިވާ ގޮތުގެ ސާދާކަމާއި ފުރިހަމަކަން ވެސް ފާހަގަކޮށްލެވެއެވެ. އޭގައިވާ މައިގަނޑު ބައިތަކަކީ ކަދުރު އޮށް ބާއްވާނެ ތަނަކާއި، ފިއްތާލާނެ އަތްގަނޑެކެވެ. ކަދުރުއޮށް ބާއްވަންޖެހޭ ތަނުގައި ބޭއްވުމަށްފަހު، އަތްގަނޑުން ފިއްތާލުމުން، އޭގެތެރެއިން އޮށް ވަކިވެއެވެ. އާލަތް ތައްޔާރުކޮށްފައިވަނީ ކަދުރުއޮށް ބާއްވާ ޔުނިޓުތައް އިތުރުކުރެވޭނެހެންނެވެ. އަދި އެ ޔުނިޓުތަކުގައި ބެހެއްޓޭ ކަދުރުގެ އޮށް އެއްފަހަރާ ވަކިކުރެވޭނެހެންނެވެ.

ޙުސައިން ޒައްޔާން އާއި އޭނާ އުފެއްދި ކަދުރުން އޮށް ނަގާ އާލަތުގެ ކުރު ޝަރަޙައެއް

އާލަތުގެ ސާދާކަން

ޙުސައިން ޒައްޔާން އުފެއްދި އާލަތް ތައްޔާރުކޮށްފައިވާ ގޮތުގެ ސާދާކަމާއި ފުރިހަމަކަން ވެސް ފާހަގަކޮށްލެވެއެވެ. އޭގައިވާ މައިގަނޑު ބައިތަކަކީ ކަދުރު އޮށް ބާއްވާނެ ތަނަކާއި، ފިއްތާލާނެ އަތްގަނޑެކެވެ. ކަދުރުއޮށް ބާއްވަންޖެހޭ ތަނުގައި ބޭއްވުމަށްފަހު، އަތްގަނޑުން ފިއްތާލުމުން، އޭގެތެރެއިން އޮށް ވަކިވެއެވެ. އާލަތް ތައްޔާރުކޮށްފައިވަނީ ކަދުރުއޮށް ބާއްވާ ޔުނިޓުތައް އިތުރުކުރެވޭނެހެންނެވެ. އަދި އެ ޔުނިޓުތަކުގައި ބެހެއްޓޭ ކަދުރުގެ އޮށް އެއްފަހަރާ ވަކިކުރެވޭނެހެންނެވެ.

އާލަތް ތަރައްޤީކުރުން

ޙުސައިން ޒައްޔާން އުފެއްދި އާލަތް އިތުރަށް ތަރައްޤީކުރުމުގެ ޚިޔާލުވެސް އޭނާގެ ވިސްނުމުގައި ވެއެވެ. އޭނާ ޝަރަޙަކޮށްދިން ގޮތުގައި، އެ އާލަތުގައި ކަދުރުއޮށް ބާއްވަން ހަދާފައިވާ ފަދަ އެތައް ޔުނިޓެއް އެއަށް އިތުރުކުރެވިދާނެއެވެ. އަދި އެ ހުރިހައި ޔުނިޓެއްގައި ބެހެއްޓޭ ކަދުރުގެ އޮށް، އެއްފަހަރާ އެއިން ވަކިކުރެވޭނެ ގޮތް ވެސް ހެދިދާނެއެވެ. އަދި އޮށް ވަކިކުރެވިފައިވާ ކަދުރުގައި އަތްނުލައި އެއިން ކަދުރު ނެގޭނެ ގޮތް ވެސް ހެދިދާނެއެވެ.

ޙުސައިން ޒައްޔާންގެ ޝަރަޙައިން އެނގުނު ގޮތުގައި އޭނާ ހުށަހަޅައިދިން އާލަތަކީ ފެށުމެކެވެ. އެއީ އޭނާގެ ވިސްނުމުގައިވާ ފުރިހަމަ އާލަތެއްގެ ލުއި ކޮންސެޕްޓެކެވެ. އެ އާލަތް އިތުރަށް ތަރައްޤީކުރުމުގެ ވިސްނުމާއި ފިކުރާއި ހުނަރު އޭނާގެ ކިބައިގައި ވެއެވެ.

ޝަރަޙަކޮށްދިނުން

އިސްކަންދަރު ސްކޫލްގެ (STEM FAIR 2022) ގައި ގިނަ ދަރިވަރުން، އެ ދަރިވަރުންގެ އުފެއްދުންތައް ހުށަހަޅައިދިނީ އިނގިރޭސި ބަހުންނެވެ. އެ ދަރިވަރުންނަށް ތަޢުލީމު ދެނީ އިނގިރޭސި ބަހުން ކަމުގައިވާތީ އެކަން އެހެން ވުމަކީ ޖާއިޒު ކަމެކެވެ. އެކަމަކު ތިމާގެ ޤައުމުގެ ބަސް، ތިމާއަށް އެނގުމަކީ ނުހަނު ބޭނުންތެރި ކަމެކެވެ. ގިނަ ދަރިވަރުންނާ ޚިލާފަށް، ޙުސައިން ޒައްޔާން ތައްޔާރުކުރި އާލަތް، ދިވެހި ބަހާއި އިނގިރޭސި ބަހުން ޝަރަޙަކޮށްދީ ހުށަހަޅައިދިންތަން ފެނުނެވެ. އެއީ ވެސް އޭނާގެ ހުނަރުވެރިކަމާއި ޤާބިލުކަމުގެ ބޮޑުކަން ހާމަވެގެންދިޔަ ކަމެކެވެ. އަދި ދިވެހިބަހާއި ޤައުމިއްޔަތުގެ ނަގަހައްޓައި ދަމަހައްޓާނެކަން އޭނާގެ ކިބައިން ސާބިތުވި ކަމެއް ވެސްމެއެވެ.

ނިންމުން

ޙުސައިން ޒައްޔާން އުފެއްދި އާލަތަކީ، މުސްލިމުންގެ ޢާންމު ދިރިއުޅުމުގެ ކޮންމެ ދުވަހަކަށް ވެސް ނުހަނު ބޭނުންތެރި އާލަތެކެވެ. ޚާއްޞަކޮށް ބަރަކާތްތެރި ރަމަޟާން މަހުގައި އެ އާލަތުގެ މުހިންމުކަމާއި ބޭނުންތެރިކަން ބޮޑުވާނެއެވެ. އެއީ އާ އީޖާދެއް ނަމަ، އޭނާގެ ނަމުގައި އެ އީޖާދު ރަޖިސްޓަރީކުރުމަކީ ވެސް ކުރަންޖެހޭ ކަމެކެވެ. އިންޓަރ ސްކޫލް މުބާރާތެއްގައި އެ އާލަތް ބައިވެރިކުރާނަމަ، އޭގެ ޔުނިޓުތައް އިތުރުކޮށް، އިތުރަށް ތަރައްޤީކުރުމަކީ ވެސް ލާޒިމު ކަމެކެވެ.

ޙުސައިން ޒައްޔާން އުފެއްދި އާލަތް ވުޖޫދުވުމުގައި އޭނާގެ ޢާއިލާއާއި، އޭނާގެ ކްލާސްޓީޗަރުގެ އިރުޝާދާއި އެހީތެރިކަން ވެސް އޮންނާނެކަން ކަށަވަރެވެ. ދިވެހިރާއްޖޭގެ ޢިއްޒަތްތެރި ނާއިބު ރައީސް އޮނަރަބްލް ފައިޞަލް ނަސީމް، އެ އާލަތަށް ތަޢުރީފުކުރެއްވި ވާހަކަ، އިސްކަންދަރު ސްކޫލްގެ ޓީޗަރަކު އަޅުގަނޑުގެ ގާތުގައި ވިދާޅުވިއެވެ. އަޅުގަނޑު ދެތިން ފަހަރަކު ފެއަރ އަށް ޒިޔާރަތްކުރީމެވެ. އެއިން ކޮންމެ ފަހަރަކުމެ، ކްލާސްޓީޗަރުން ދަރިވަރުންނާއެކުގައި އުޅުއްވާތަން ދުށީމެވެ. ސްކޫލް ތެރޭގައި ކަންކަން ރޭވި ތަރުތީބުކުރެވިފައިވާ ގޮތުގެ އިންތިޒާމު ވެސް ވަރަށް ފުރިހަމައެވެ. އެއިން އަންގައިދެނީ، އިސްކަންދަރު ސްކޫލަކީ ހަރުދަނާ ވެރިންނާއި، ހިންމަތްތެރި ޓީޗަރުންނާއި، މުރާލި މުވައްޒަފުންނާއި، ކިޔަމަންތެރި ދަރިވަރުންތަކެއްގެ މައްޗަށް ބިނާވެފައިވާ ފަޚުރުވެރި ސްކޫލެއް ކަމެވެ.

އަޅުގަނޑުގެ ދުޢާއަކީ، ޙުސައިން ޒައްޔާން މުޙައްމަދު ފަރްޙަތު ފަދަ ގިނަ ދަރިވަރުންތަކެއް އިސްކަންދަރު ސްކޫލުން އުފެދުމެވެ. މާތް ﷲ މި ދުޢާ އިޖާބަކުރައްވާށިއެވެ. އާމީން.