ބަޙުރު

ކްލާހުގައި ތިބި ދަރިވަރުންގެ ކުރިމައްޗަށް ސުވާލެއް ހުށަހެޅީމެވެ. "ޢަރަބި ބަސް ކިޔަވަން ބޭނުންވި ސަބަބަކީ ކޮބައިހެއްޔެވެ؟" އެކި ދަރިވަރުން އެކި ސަބަބު ބަޔާންކުރިއެވެ. "އެއީ ކީރިތި ޤުރްއާނުގެ ބަސް ކަމުގައި ވީތީއެވެ." "އެއީ އިސްލާމްދީނުގެ ބަސް ކަމުގައި ވީތިއެވެ." "އެއީ މައްކާގެ ބަސް ކަމުގައި ވީތީއެވެ." އެންމެ ދަރިވަރަކު ފިޔަވައި އެހެން ދަރިވަރުން ބަޔާންކުރީ މި ބާވަތުގެ "ވީތީ" ސަބަބުތަކެވެ.

ޢަރަބި ބަސް ކިޔަވަނީ ޙިކުމަތްތެރި ބޭނުމުގައިކަން ހާމަކުރީ، އެންމެ ދަރިވަރެކެވެ. އެއީ މެޑަމް ސާޖިދާ މުޙައްމަދެވެ. އެ ކަމަނާ ޢަރަބި ބަސް ކިޔަވާވިދާޅުވާން ބޭނުންފުޅުވީ، ޢަރަބި ބަހުގެ ދީނީ ޢިލްމީ ފޮތްތައް ވިދާޅުވުމަށް ޓަކައެވެ. އެ ދުވަހު އެނގުނު ގޮތުގައި، އެ ކަމަނާގެ މާތް ބައްޕާފުޅަކީ، އައްޝައިޚު މުޙައްމަދު އިބްރާހީމް (رَحِمَهُ الله) އެވެ. މާތްﷲ، ލޮބުވެތި ޝައިޚަށް ސުވަރުގޭގެ ދާއިމީ މަތިވެރި ނިޢުމަތް މިންވަރުކުރައްވާށިއެވެ! އާމީން.

މެޑަމް ސާޖިދާގެ ރިވެތި އަޚުލާޤާއި ޙިކުމަތު ޢަމަލީގެ ހެޔޮ އަސަރު، ކުލާހުގައި ތިބި އެހެން ދަރިވަރުންގެ މައްޗަށް ފެތުރިގެންދިޔައެވެ. ދިވެހިރާއްޖޭގެ އިސްލާމީ ޔުނިވަރސިޓީގައި އެ ކަމަނާ ހޭދަކުރެއްވި ކުރު މުއްދަތުގެ ތެރޭގައި، ޙާޞިލުކުރެއްވި ކާމިޔާބު ލާމަސީލެވެ. އެހެނީ، ވިދާޅުވާން ބޭނުންފުޅުވާ އެއްޗެއް ޢަރަބި ބަހުން ވިދާޅުވުމާއި، ގެތިފައިވާ ޖުމުލަތައް ޢަރަބި ބަހުން ލިޔުއްވައި، ތަޢުބީރުކުރެއްވުމުގެ ޤާބިލުކަން ހޯއްދެވިއެވެ. އޭރު އެ ކަމަނާ ސަރުކާރުގައި އަދާކުރެއްވި މަޤާމުގެ މަސައްކަތް ބުރައެވެ. އަދި ޢާއިލީ ޒިންމާތައް ވެސް އުފުއްލެވިއެވެ.

ދަރިވަރުންގެ ފެންވަރު ވަޒަންކުރުމަށް ހަމަޖެހިފައިވާ އުޞޫލުން ކްލާހުގައި ދެވުނު އިޚްތިބާރުން ވެސް، މެޑަމް ސާޖިދާ މަތީ ދަރަޖައެއް ހޯއްދެވިއެވެ. އެ އިޚްތިބާރުގައި އެ ކަމަނާ ލިޔުއްވި ކުރު މަޒުމޫނު ވެސް ނުހަނު ޙިކުމަތްތެރިއެވެ. އޭގައި އެ ކަމަނާ ލިޔުއްވި ޢިބާރާތްތައް، އެ ލެވެލްގެ ނިސްބަތުން ނުހަނު ރަނގަޅެވެ. ޢާއިލާއަށާއި ފިރިކަލުންނަށް ދެއްވާ އަހައްމިއްޔަތުގެ ބޮޑުކަން، އެ އިން މޭރުންވިއެވެ. އޭގައި ވާ ބަނިޔާދަން ޝުޢޫރުތައް ހަނދާންކޮށްދިނީ، "ކާމިޔާބު ކޮންމެ ބަޠަލެއްގެ ފަހަތުގައި ޙިކުމަތްތެރި އަންހެނަކު ވާނެ" ކަމަށް ބުނާ ޙިކުމަތެވެ!!!

ސެމިސްޓަރގެ ކިޔެވުން ނިމި، ދުވަސްކޮޅެއް ފާއިތުވިފަހުން އައި ދުވަހެކެވެ. ގެއަށް ދިއުމަށް ޓަކައި ހަނި މަގަކުން ދަނިކޮށް ބޭކަނބަލަކު ގޮވައިލެއްވިއެވެ. އެއީ މެޑަމް ސާޖިދާގެ ކޮއްކޯފުޅުކަން އެނގުނެވެ. ސައިކަލުގައި ވަޑައިގެން އަޅުގަނޑާ އަރާހަމަކުރެއްވިއެވެ. މެޑަމް ސާޖިދާ އިންނެވި އެ ސައިކަލުގެ ފަހަތުގައެވެ. އެ ދުވަހު ވެސް އެ ކަމަނާ ވިދާޅުވީ ޢަރަބި ބަސް ކިޔަވާވިދާޅުވުމަށް އޮތް ޝައުޤުވެރިކަމުގެ ވާހަކައެވެ. އަދިވެސް ޢަރަބި ބަސް ކިޔަވާވިދާޅުވުމަށް، ޔުނިވަރސިޓީއަށް ވަޑައިގަންނަވަން ބޭނުންފުޅު ކަމުގައި ވިދާޅުވިއެވެ. ދެންނެވީމެވެ. "ދެން ޢަރަބި ބަސް ކިޔަވާވިދާޅުވާން ވާނީ ގަނޑުވަރުގައެވެ!!!" މިހެން ދެންނެވީ، ދިވެހިރާއްޖޭގެ ރައީސުލްޖުމްހޫރިއްޔާގެ މަޤާމަށް، އެ ކަމަނާގެ ޢިއްޒަތްތެރި ފިރިކަލުން އިންތިޚާބުވެ ވަޑައިގަންނަވާނެކަން ޔަޤީންވާތީއެވެ!

މެޑަމް ސާޖިދާ މުޙައްމަދަކީ ނުހަނު އަޚުލާޤު ރަނގަޅު، ނުހަނު ބަނިޔާދަން، އަދި އެހައިމެ ޙިކުމަތްތެރި ބޭކަނބަލެކެވެ. އެ ކަމަނާއާ ބައްދަލުވި ފަދައިން، އެ ކަމަނާގެ މާތް ބައްޕާފުޅުގެ އެހެން ދެ ބޭފުޅަކާ ވެސް ބައްދަލުވިއެވެ. އެއީ ވެސް ނުހަނު އަޚުލާޤު ރަނގަޅު، ހެޔޮ ލަފާ ދެ ބޭފުޅެކެވެ. އަޅުގަނޑަށް އެނގިފައިވާ އެއްޗެއް، ލޮބުވެތި ޝައިޚުގެ ދަރިކަލަކަށާއި ދެ ދަރިކަނބަލަކަށް ބުނެދިނުމުގެ ފުރުޞަތު މިންވަރު ކުރެއްވީ، ދީލަތިވަންތަ މާތްﷲ އެވެ. އެކަލާނގެ މަތިވެރި ޙަޟުރަތަށް ޙަމްދުކުރަމެވެ.

މާތްﷲ، މެޑަމް ސާޖިދާ މުޙައްމަދުގެ ރިވެތި އަޚުލާޤާއި ޙިކުމަތްތެރިކަން އިތުރުކުރައްވާށިއެވެ! އެ ކަމަނާގެ މާތް ބައްޕާފުޅަށް ސުވަރުގޭގެ ދާއިމީ މަތިވެރި ނިޢުމަތް މިންވަރުކުރައްވާށިއެވެ! އަދި ޢާއިލާގެ އެންމެހައި ބޭފުޅުންނަށް، ދެ ދުނިޔޭގެ ބާއްޖަވެރިކަން އިރާދަކުރައްވާށިއެވެ! އާމީން.