ބަޙުރު

ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިންގެ މަދަދުވެރިކަން އަޅުގަނޑަށް ޙާޞިލުވާންފެށީ، ވިހި ވަނަ ޤަރުނުގެ އަށްވަނަ ދަހަރުގެ ކުރީކޮޅުގައެވެ. އަޅުގަނޑަށް އެ މަނިކުފާނުގެ ފައިންޕުޅު ފެނުނީ ހަވީރުގެ އިދާރާއިންނެވެ. އޭރު ހަވީރު ނޫސް ލިޔަނީ އަތުލިޔުމުންނެވެ. އޭރު އަޅުގަނޑުގެ މަސައްކަތަކީ، ނޫހުގެ އެތެރޭގައިވާ ޞަފުޙާތަކުގައި ބައެއް ސުރުޚީތައް ބޮޑުއަކުރުން ލިޔުމެވެ.

އެއްދުވަހަކު ޑރ. ޒާހިރު، "އަލްފުރްސާން" މަޖައްލާގެ ޢަދަދެއް އަޅުގަނޑަށް ދެއްވިއެވެ. އޭގައިވާ ލިޔުންތައް ބަލައިލުމަށް ވެސް ވިދާޅުވިއެވެ. އެއަށްފަހު ވިދާޅުވީ އޭގައިވާ ކުރު ލިޔުންތައް ތަރުޖަމާކުރުމަށެވެ. އެއީ އޭރު އަޅުގަނޑާ ލާހިކު ކަމެއް ކަމުގައި ނުވިއެވެ. އެ ކަން އަޅުގަނޑަށް ނުކުރެވޭނެ ކަމުގައި ދެންނެވީމެވެ. ދެންފަހެ، ނޭނގޭ ލަފުޒުތަކުގެ މާނަ ވިދާޅުވެދެއްވަން ފެށްޓެވިއެވެ. ތަރުޖަމާކުރުމުގެ ތެރެއަށް ވަދެވުނީ، ޑރ. ޒާހިރުގެ އެ މަދަދުންނެވެ.

ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިނަކީ، ދިވެހިރާއްޖެ ބިނާކުރެއްވި އައުދާނަ ބާނީއެއް ކަމުގައި ދެންނެވުމުގެ ބޭނުމެއް ނެތެވެ. އެއީ މި ރާއްޖޭގެ އެންމެން ދަންނަ ޙަޤީޤަތެކެވެ. އަޅުގަނޑުގެ ތަޢުލީމީ ޙަޔާތުގައި، އެ މަނިކުފާނުގެ އިރުޝާދާއި ވާގިވެރިކަން ވަރަށް ބޮޑަށް ލިބިފައި ވެއެވެ. ޙަޔާތުގައި ބައްދަލުވި ބައެއް ބޭފުޅުންނާ ޚިލާފަށް، ޑރ. ޒާހިރަކީ، ނުހަނު ހިތްޕުޅު ހެޔޮ ބޭފުޅެކެވެ.

ދިވެހިރާއްޖެއަށް ޛުލްޤަރްނައިނި ވަޑައިގެންނެވި ވާހަކައިގެ ތަރުޖަމާއެއް އަޅުގަނޑު ލިޔުނުކަން އެ މަނިކުފާނަށް އެނގިވަޑައިގަތުމުން، އެ ކަމާބެހޭ އިތުރު ތަފުޞީލުތައް ދެއްވިއެވެ. އެ ވާހަކައިގައި ހުރި ޙަޤީޤަތްތަކާއި އުނި ކަންކަން ވިދާޅުވެދެއްވިއެވެ. އެ ކަމަށް ޓަކައި އެއްދުވަހަކު އެ މަނިކުފާނުގެ ގެކޮޅަށް އަޅުގަނޑު ގެންދަވައި، ސައިފޮދެއް ދެއްވިއެވެ. އެ ދުވަހު އެ މަނިކުފާނުގެ ތަޢުލީމީ ޙަޔާތްޕުޅުން ބައެއް ޞަފުޙާތައް ވިދާޅުވެދެއްވިއެވެ. އެ ދުވަހު އެންމެ ބޮޑަށް އުފާވި އެއް ކަމަކީ، އެ މަނިކުފާނުގެ ލޮބުވެތި އަނބިކަނބަލުން އަލްމަރްޙޫމާ ނާއިލާ އިބްރާހީމް ކަލޭގެފާނުގެ ފައިންޕުޅު ފެނުނު ކަމެވެ. މާތްﷲ، އެ ކަމަނާއަށް ސުވަރުގޭގެ ދާއިމީ ނިޢުމަތް މިންވަރުކުރައްވާށިއެވެ! އާމީން.

ދިވެހިރާއްޖެ މި އަދު މި ދެކޭ ނޫސްވެރިކަން ތަރައްޤީކުރެއްވި ޙިކުމަތްތެރިއަކީ، ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޑރ. މުޙައްމަދު ޒާހިރު ޙުސައިން ކަމަށް ހެކިވަމެވެ. ދިވެހި ނޫސްވެރިކަމާއި ލިޔުންތެރިކަމުގެ ތަހުޒީބީ ފިކުރާއި އިންސާނީ ވަސީލަތް ބިނާކުރެއްވުމުގައި އެ މަނިކުފާނުގެ ޙިއްޞާ ވަރަށް ވެސް ބޮޑެވެ.

މާތްﷲ، ޑރ. މުޙައްމަދު ޒާހިރު ޙުސައިން (ނޢޢވ) އަށް، ފުރިހަމަ ޞިއްޙަތާއި ދުޅަހެޔޮކަން މިންވަރުކުރައްވާށިއެވެ! އަދި އެ މަނިކުފާނުގެ ދެމިހުންނަނިވި ހެޔޮ ޒިކުރާ، އަޅުގަނޑުމެންގެ ހިތްތަކާއި ގަލަންތަކުގައި ލައްވާށިއެވެ! އާމީން.