ބަޙުރު

އަލްމަރްޙޫމް ޝަހީދު ޑރ. އަފްރާޝީމް ޢަލީގެ ހެޔޮ ޒިކުރާތައް ވަރަށް ގިނައެވެ. އެ މަނިކުފާނަކީ، މަޢުހަދުއް ދިރާސާތިލް އިސްލާމިއްޔާގައި ކިޔަވާވިދާޅުވާން އުޅުއްވިއިރުއްސުރެ އަޅުގަނޑުގެ އެކުވެރިއެކެވެ. އޭރު ވެސް ވަރަށް ހަރުދަނާ ވާހަކަތަކާއި، ވަރަށް މަޖާ ވާހަކަތައް ދައްކަވައެވެ. އާދަޔާ ޚިލާފަށް ހެޔޮކަން ފޯރުކޮށްދެއްވުމަކީ އެ މަނިކުފާނުގެ އަރިއަހުން ފާހަގަވި ޙިކުމަތްތެރި މާތް ސިފައެކެވެ.

ތަޢުލީމުގެ ވަކި ހިސާބަކުން އަޅުގަނޑުމެން ދެ މީހުން ދާން ޖެހުނީ ދުނިޔޭގެ ދެ ބިތަށެވެ. އެ މަނިކުފާނު ވަޑައިގެންނެވީ ދިވެހިރާއްޖެ ދޫކުރައްވައި ދުނިޔޭގެ އިރުމަތީ ބިތުގައި ވާ މެލޭޝިއާ އަށެވެ. އަޅުގަނޑު ދާންޖެހުނީ ފުރަތަމަ ޤަޠަރަށެވެ. ދެން މިޞްރަށެވެ. އެ އަށްފަހު، އަޅުގަނޑުމެން ދެމީހުން ބައްދަލުވީ، ރައީސް މައުމޫނުގެ ވެރިކަމުގެ ފަހުކޮޅުގައެވެ.

ޑރ. އަފްރާޝީމް އަށް، ސަރުކާރުން މަތީ މަޤާމެއް ލިބިވަޑައިގަތެވެ. އޭރު އަޅުގަނޑު ހުރީ ވަރަށް އާދައިގެ ވަޒީފާއެއްގައެވެ. އެ މަނިކުފާނަށް އެ ކަން އެނގިވަޑައިގަތުމުން، އަޅުގަނޑު ގެންދެވިއެވެ. އަދި އެ މަނިކުފާނާއެކު ބައެއް މަސައްކަތްތަކުގައި އުޅެވޭނެ ގޮތް ހަމަޖައްސަވައިދެއްވިއެވެ. އެއީ އެ މަނިކުފާނު އަޅުގަނޑަށް ކުރެއްވި ވަރަށް ބޮޑު ތަކްރީމެއް ކަމުގައި ޤަބޫލުކުރެވުނެވެ. އެއީ ކީއްވެތޯ އަހައިލަން ވެސް ނުކެރިފައި ހުއްޓާ އެއްދުވަހަކު ވިދާޅުވިއެވެ. ތިމަން މަނިކުފާނަށް، މުޢީދުގެ ކިބައިން ވަރަށް ބޮޑު ހެޔޮކަމެއް ލިބިވަޑައިގެންފައި ވެއެވެ. އެއީ ކޮން ކަމެއްތޯ ދެންނެވީމެވެ. ވިދާޅުވީ، އެއީ "އަތުލިޔުމުގެ ރީތިކަން" ކަމަށެވެ. އެ މަނިކުފާނު ވިދާޅުވީ، އެ މަނިކުފާނުގެ އަތުލިޔުން ރީތިކޮށްދިނީ އަޅުގަނޑު ކަމަށެވެ. އެ ކަމަކީ އެ މަނިކުފާނުގެ ހަނދުމަފުޅުގައި އަބަދުވެސް ހުންނަ ކަމެއް ކަމަށެވެ. އަދި މެލޭޝިއާގައި ކިޔަވާވިދާޅުވާން އުޅުއްވިއިރު، އެ ކަމުގެ ފައިދާ ލިބިވަޑައިގަތް ކަމަށެވެ.

ޑރ. އަފްރާޝީމުގެ އަރިއަހުގައި ޖަލަށް ދިޔަ ދުވަސްތަކަކީ އައު ތަޖުރިބާތަކެއް ކުރެވުނު މޫސުމެކެވެ. ޖަލުގައި ތިބި މީހުންގެ ޙާލަތު އޭރު އޮޅުންފިލިއެވެ. އެ މީހުންނާމެދު ޑރ. އަފްރާޝީމް ގެންގުޅުއްވީ ހެޔޮ ވިސްނުންފުޅެކެވެ. އެ މީހުންނަށް ވެސް ރަނގަޅު ގޮތްތަކެއް ހޯއްދަވައިދެއްވަން އެތައް މަސައްކަތްޕުޅެއް ކުރެއްވިއެވެ. އެ މީހުން މިނިވަންކުރެއްވުމާއި، އެ މީހުން މުޖުތަމަޢަށް އަލުން ނެރުއްވުމަކީ އެ މަނިކުފާނުގެ ވަރަށް ބޮޑު އުންމީދެކެވެ. އެންމެ ބޮޑު އިސްކަމެއް ދެއްވީ، އެ މީހުންނަށް ދީނީ ތަޢުލީމު ދެއްވުމަށެވެ. ދެން މަސައްކަތެއް ދަސްކޮށްދެއްވުމަށެވެ. އެ ކަމުގެ ހެޔޮ އަސަރު، އެއިން ބައެއް މީހުންގެ ކިބައިން ފަހުން ފެނުނެވެ.

ޑރ. އަފްރާޝީމަކީ މާތްވެގެންވާ އިސްލާމްދީނަށް ވަރަށް ބޮޑަށް ނަޞްރުދެއްވި ޙިކުމަތްތެރި ހަރުދަނާ ޢިލްމުވެރިއެކެވެ. އުނގެނިވަޑައިގަތުމާއި އުނގަންނައި ދެއްވުމަކީ، އެ މަނިކުފާނުގެ ނަފުސުގައި ނުހަނު ފުނަށް މޫލާފައިވާ ކަމެކެވެ. އެ މަނިކުފާނު ކުރައްވާ ކޮންމެ ކަމެއް ކުރައްވަނީ، ޙިކުމަތްތެރިކަމާއެކު ތަރުތީބުން އިންތިޒާމުކުރައްވައިގެންނެވެ. އަދި އެ ގޮތަށް ކަންކަން ކުރުމަށް އިރުޝާދު ވެސް ދެއްވައެވެ.

ޑރ. އަފްރާޝީމާ އެކުގައި އުޅުނު ދުވަސްވަރު، އެ މަނިކުފާނުގެ ޢަދާވާތްތެރިންގެ ކިބައިން ނުރައްކާތައް ކުރިމަތިވިއެވެ. އެއް ރެއަކު އަޅުގަނޑުމެން ދެ މީހުން، ޢިމާރާތެއްގެ ތެރެއަށް ވަންނަނިކޮށް، މަގުމަތިން އައި ބަޔަކު އެ މަނިކުފާނަށް އިންޒާރުދީ ގަލުން ތަޅައިގަތެވެ. އެއިން ގާބުރިއެއް، އަޅުގަނޑުމެން ދެ މީހުންކުރެ މީހެއްގެ ގަޔަކު ނުޖެހެއެވެ. ނަމަވެސް ޢިމާރާތުގެ ދޮރުގައި ޖެހުނެވެ. އަޅުގަނޑުމެންގެ ގައިގައި ނުޖެހުނީ، ޢިމާރާތުގެ ތެރެއަށް އަވަހަށް ވަދެ، ދޮރު ލެއްޕީމައެވެ. އެ ރެއިން ފެށިގެން، ޑރ. އަފްރާޝީމާ އެކުގައި ތަންތަނަށް ގޮސްއުޅުން ހުއްޓައިލީމެވެ. އެއީ މި ދެންނެވި ހާދިސާ ނޫނަސް، އެ މަނިކުފާނުގެ ފުރާނަފުޅަށް ނުރައްކާތެރި އެތައް ހާދިސާތަކެއް އޭރު ހިނގަމުންދާތީއެވެ. އަދި އެއިން މިންވަރެއް އަޅުގަނޑުމެންނަށް ވެސް އަމާޒުވާތީއެވެ. އެ މަނިކުފާނު ޝަހީދުކޮށްލެވުނީ، އެ ފަދަ އެތައް ހާދިސާތަކަކަށް ފަހުގައެވެ. އެ ހުރިހައި ހާދިސާތަކެއްގެ ކުރިމަތީގައި އެ މަނިކުފާނު ހުންނެވީ، ނުހަނު ސާބިތުކަމާއެކުގައެވެ. އެ މަނިކުފާނަކީ ނުހަނު ޢަޒުމު ވަރުގަދަ ޢިލްމުވެރިއެކެވެ. ނުހަނު އަޚުލާޤު ރަނގަޅު މަދަދުވެރިއެކެވެ. ނުހަނު ކެތްތެރި ޙިކުމަތްތެރިއެކެވެ.

މާތްﷲ، އަލްމަރްޙޫމް ޝަހީދު ޑރ. އަފްރާޝީމު ޢަލީގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކުރައްވާށިއެވެ! އަދި އެ މަނިކުފާނުގެ ޢިލްމީ ފިކުރާއި މަންހަޖު ދަމަހައްޓަވާށިއެވެ! އާމީން.