ބަޙުރު

އަލްއަޚު މުޙައްމަދު އާދަމް ސަލީމް އާ ބައްދަލުވުމުގެ ނިޢުމަތް ލިބުނީ، ވިހި ވަނަ ޤަރުނުގެ އަށްވަނަ ދަހަރުގެ ކުރީކޮޅުގައެވެ. ލަފާކުރެވޭ ގޮތުގައި އެއީ 1983 ވަނަ އަހަރެވެ. އޭރުއްސުރެ މިއަދާ ހަމައަށް 40 އަހަރަށްވުރެ ދިގު މުއްދަތެއް ފާއިތުވެގެން ހިނގައްޖެއެވެ. ނަމަވެސް މިހާރު ވެސް އެއީ ނިމިދިޔަ ޤަރުނުގެ އަށްޑިހައިގެ އަހަރުތަކުގެ އެކުވެރި ސަލީމެވެ!!!

އަޚު މުޙައްމަދު ސަލީމަކީ ޒަމާންވީ ގިނަ އެކުވެރިންނާ ތަފާތު ޝަޚުޞިއްޔަތެކެވެ. އެ ކަން އުދަވާ މާތް ސިފަތަކެއް އޭނާގެ ކިބައިން ފާހަގަކުރެވެއެވެ. އެއީ ޙިކުމަތްތެރިކަމެވެ. ހިތްހެޔޮކަމެވެ. މުޢާމަލާތްކުރުމުގެ ރިވެތިކަމެވެ. ބަސްމަގުގެ ފަށުވިކަމެވެ. ވިސްނުމާއި ފިކުރުގެ ތަހުޒީބުކަމެވެ. އޭނާގެ ލާމަސީލު ލިޔުންތެރިކަމަކީ، އޭނާގެ ޝަޚުޞިއްޔަތުގެ ތަޞްވީރެއް ކަމުގައި ޤަބޫލުކުރެވެއެވެ. އޭނާއާ ބައްދަލުވާ ކޮންމެ ފަހަރަކުމެ، އޭނާގެ މާތް ބައްޕާފުޅު، އަލްމަރްޙޫމް އާދަމް ސަލީމްގެ ޒިކުރާތައް ހިތުގެ ޢުމުޤުގައި އައުވެގެންދެއެވެ.

އަލްމަރްޙޫމް އާދަމް ސަލީމަކީ، އަޅުގަނޑުމެންގެ ޖީލުގެ ބައެއް ދަރިވަރުންނަށް ދިވެހިބަހާއި އަދަބިއްޔާތާއި ޅެންވެރިކަން ކިޔަވައިދެއްވި ލޮބުވެތި އުސްތާޛެކެވެ. ދުނިޔޭގެ ހަމަތަކާއި އުޅުމާއި ގުޅުމުގެ އުޞޫލުތައް ދަސްކޮށްދެއްވި ހަރުދަނާ ޙިކުމަތްތެރިއެކެވެ. މާތްﷲ، ލޮބުވެތި އުސްތާޛަށް ސުވަރުގޭގެ ދާއިމީ ނިޢުމަތް މިންވަރުކުރައްވާށިއެވެ! އާމީން.

އަޚު މުޙައްމަދު ސަލީމަކީ މި ޖީލުގެ އެންމެ ފުންނާބުއުސް އެއް ޝާޢިރު ކަމުގައި ދަންނަވާކަށެއް ނުޖެހެއެވެ! އޭނާގެ ޝާޢީރީ މުތީތަކަކީ ވަންހަނާވެފައިވާ ޖަވާހިރުތަކެއް ނޫނެވެ!!! އޭނާގެ ޅެންވެރިކަމުގެ ދީވާނަކީ، މި ޖީލުގެ ދަރިންނާއި އަންނަން އޮތް ޖީލުތަކުގެ ދަރިން، ދިވެހި ޅެންވެރިކަން އުނގެނެން އޮތް ގުލްޒާރެކެވެ.

މާތްﷲ، އަލްއަޚު މުޙައްމަދު އާދަމް ސަލީމްގެ ޢުމުރުފުޅު ދަންމަވާށިއެވެ! އޭނާގެ އަދަބީ ބުސްތާނާއި ޝާޢިރީ ދީވާނަކީ، ދިވެހި ދަރީންނަށް ޙިކުމަތުގެ ތަރިކައެއް ކަމުގައި ލައްވާށިއެވެ! އާމީން.