ބަޙުރު

އަލްއަޚު މުޙައްމަދު ޢާމިރު ފަރެސް އާ، އެންމެ ފުރަތަމަ ބައްދަލުވި ދުވަހު ވެސް، އޭނާގެ ޝަޚުޞިއްޔަތުގެ ތަފާތުކަން ފާހަގަކުރެވުނެވެ. އެހެން މީހުންނަށް ލިބިފައި ނެތް ބުއްދިއަކާއި ނަޒަރަކާއި ފަލްސަފާއެއް އޭނާއަށް ލިބިވަޑައިގެންފައި ވާކަން މޭރުންވިއެވެ. އޭނާގެ ޝާޢިރީ ޖަޒުބާތާއި އަދަބީ ފިކުރުންނެވެ.

އަޅުގަނޑަށް އުޅެވިފައިވާ ޅެންވެރިކަމުގެ ވާދީތަކާއި އަދަބިއްޔާތުގެ ބުސްތާންތަކުގައި އޭނާއަށް އިޝާރާތްކުރެވެނީ "ފަރެސް ޢާމިރު" ގެ ނަމުންނެވެ. އެ ނަމުން "ފަރެސް" އުނިވެއްޖެ ނަމަ، އެއީ ކޮން ޢާމިރެއްކަން އެނގުމަކީ ދަތިކަމެކެވެ. ދިވެހިރާއްޖޭގައި، ނަމުން ޢާމިރުންނަކީ ގިނަ ބަޔެކެވެ! އޭނާގެ ނަމުގައިވާ "ފަރެސް" އަކީ އަބަދު ވެސް އަޅުގަނޑުގެ ހިތުގެ ވިންދަށް ސަވާރުވާ އަސްވާރެކެވެ! އެއީ ކުޑައިރުއްސުރެ ފަރެހުގެ ވާހަކަތަކުން ހިތް ބަރާވެފައި ވާތީއެވެ. އެހެނީ، އަޅުގަނޑުމެންގެ ޢާއިލާގެ ގޮތްޕެއް އެ ރަށުގައި ވެއެވެ.

އަލްއަޚު ފަރެސް ޢާމިރަކީ، ވަރަށް ރަނގަޅު އުސްތާޛަކަށް ދަރިވަރުވެފައިވާ "ދަރުމަވަންތަ" ޝަޚުޞިއްޔަތެކެވެ. އޭނާގެ ބަހުން ދަންނަވާނަމަ، އެ އުސްތާޛަކީ "އެދުރުބެ" އެވެ. އެއީ އަލްމަރްޙޫމް ޔޫސުފު މުޙައްމަދުފުޅެވެ. މާތްﷲ، އެދުރުބެއަށް ސުވަރުގޭގެ ދާއިމީ ނިޢުމަތް މިންވަރުކުރައްވާށިއެވެ! އާމީން.

އަލްއަޚު ފަރެސް ޢާމިރާ ބައްދަލުވާ ކޮންމެ ފަހަރަކުމެ، އުންމީދުގެ އައު ދޯއްޖެއް ޙާޞިލުވެއެވެ. އެއީ ބަރަކާތުގެ ރޯއްޖެއްކަން ފަހުން އެނގެއެވެ. ޙަޔާތުގެ ބައެއް ދުވަސްތަކަކީ އުޖާލާ ދުވަސްތަކެއް ނޫނެވެ. އެ ފަދަ ކޮންމެ ދުވަހެއްގައި، އޭނާއާ ބައްދަލުވެލުމަށް ހިތް އެދެއެވެ. ހިތުގައި ހިނގާ އުދާސްތައް ހާމަނުކުރަނީސް، އެއަށް އެކަށޭނަ ފަރުވާއެއް، އޭނާގެ ފިކުރުން ވެދުންކޮށްލައްވައެވެ!

އަލްއަޚު ފަރެސް ޢާމިރާ އެހެން މީހުންނާ ހުރި ތަފާތު ހާމަވާ މިސާލެއް ދަންނަވައިލާނަމެވެ. ޢިމާރާތް ފަރުމާކުރުމަކީ، ކުރިން އަޅުގަނޑު ކުރި ކަމެކެވެ. އެ ކަމުގެ ހުއްދަ ބާޠިލުވެދިޔަ ފަހުން ވެސް މީހުން އެ ކަމަށް އެދެއެވެ. އަޅުގަނޑުގެ އަތުގައި ހުއްދައެއް ނެތް ކަމަށް ބުނުމުން، މީހުން ފަހަތަށް އެނބުރި ހިނގައިދެއެވެ. އަޅުގަނޑުގެ އަތުގައި އެ ހުއްދަ ނެތްކަން އެނގިވަޑައިގަތުމުން، އެ ހުއްދަ ހޯއްދަވައިދެއްވަން މަސައްކަތްކުރެއްވި ހަމައެކަނި ބޭފުޅަކީ ފަރެސް ޢާމިރެވެ!!!

"މީސްތަކުންނީ މަޢުދަންތަކެއް" ކަމަށް، ރަސޫލުﷲ ޞައްލަﷲ ޢަލައިހި ވަސައްލަމަ ޙަދީޘްކުރެއްވިއެވެ. އެ މަޢުދަންތަކުގެ ތެރެއިން ފަރެސް ޢާމިރަކީ އަގުބޮޑު މަޢުދަނެކެވެ. އޭނާގެ ބަހަވީ ވިސްނުން ތަނަވަހެވެ. ޝާޢިރީ ޖަޒުބާތު ވަރުގަދައެވެ. އަދަބީ ފިކުރު މުއްސަންޖެވެ. ހާޒިރު ޖަވާބު މޮޅެވެ. ވިސްނުން ޙިކުމަތްތެރިއެވެ. އޭނާއަކީ ފަސްމީރު ކުރިރުކެކެވެ.

މާތްﷲ، އަލްއަޚު މުޙައްމަދު ޢާމިރު ފަރެސްގެ ޙިކުމަތް އިތުރުކުރައްވާށިއެވެ! އޭނާގެ މަޢުދަނުގެ ބެބުޅުމަކީ، ދިވެހި ޅެންވެރިކަމާއި އަދަބިއްޔާތަށް، "ޒާދެއް" ކަމުގައި ލައްވާށިއެވެ! އާމީން.