ބަޙުރު

އޮނަރަބްލް އާދަމް ނަޞީރު އިބްރާހީމް ނުވަތަ އަޅުގަނޑުމެން ކިޔާ ގޮތަށް ނަމަ، އުސްތާޛު ނަޞީރަކީ، އަޅުގަނޑުގެ ޒަމާންވީ އެކުވެރިއެކެވެ. އެ މަނިކުފާނާ އެންމެ ފުރަތަމަ ބައްދަލުވީ މަޢުހަދުއް ދިރާސާތިލް އިސްލާމިއްޔާއިންނެވެ. އޭރު އެ މަނިކުފާނުގެ ޢުމުރުފުޅު ވާނީ ފުރާވަރުގެ ތެރޭގައި ކަމަށް ލަފާކުރެވެއެވެ. އެހެނަސް، އޭރު ވެސް އެ މަނިކުފާނަކީ، ޙިކުމަތްތެރިއެކެވެ. ޙިކުމަތްތެރި ބަސްފުޅުތައް ވިދާޅުވެއެވެ. ޙިކުމަތްތެރި ޢަމަލުފުޅުތައް ކުރައްވައެވެ. ފަހުން އެނގުނު ގޮތުގައި އެ ކަން ގުޅިފައިވަނީ، އެ މަނިކުފާނު ދަރިވަރުވެ ވަޑައިގެންނެވި ޙިކުމަތްތެރިންނާއެވެ.

ދިވެހިރާއްޖޭގެ އިހާއި ފަހުގެ ޙިކުމަތްތެރިންނާއި ޢިލްމުވެރިންނާއި ޝާޢިރުންގެ ހެޔޮ އަސަރު، އުސްތާޛު ނަޞީރުގެ ނަފުސުގައި ވެއެވެ. އެ މަނިކުފާނުގެ ޢަމަލުފުޅުތަކާއި ބަސްފުޅުތަކުން އެ ކަން ތިލަވެއެވެ. އެ މަނިކުފާނުގެ ނޫރާނީ ގަލަންކޮޅުން ފެވޭ އަކުރުތަކުން އެ ކަން ބަޔާންވެއެވެ. އެ މަނިކުފާނު ފުން ޚިޔާލާއި ޖަޒްބާތުން މިނެ ކިރޭ ޅެންތަކުން އެ ކަން ސާބިތުވެއެވެ. ވަޒީރުކަން ލިބިވަޑައިގަންނަވަންދެން އެ މަނިކުފާނު އުޅުއްވީ ތިން ނަމުން ނަންދެވުނު ޙިކުމަތުގެ ކިއްލާގައެވެ. އެއީ އެންމެ ފުރަތަމަ މަޢުހަދެވެ. ދެން ކުއްލިއްޔާއެވެ. އެއަށްފަހު ޖާމިޢާއެވެ. މިހާރުގެ ޖާމިޢަތުލް މާލްދީފިލް އިސްލާމިއްޔާއެވެ. ދިވެހިރާއްޖޭގެ އިސްލާމީ ޔުނިވަރސިޓީއެވެ.

މަޢުހަދާއި ކުއްލިއްޔާއާއި ޖާމިޢާގައި އުޅުއްވި ހުރިހައި އުސްތާޛުންގެ ޙިކުމަތްތެރިކަން އެއް ކަންވާރަކަށް އަޅައިފިނަމަ، އެއީ އުސްތާޛު ނަޞީރެވެ! އެ މަނިކުފާނުގެ ޅެންތަކުން ވިދާ މުތީތަކަކީ އެ ކަމުގެ އުޖާލާ ހެއްކެކެވެ. އެ މަނިކުފާނުގެ ތަޤްރީރުތަކުން އުދަވާ ޖަވާހިރުތަކަކީ އެ ކަމުގެ އަލިގަދަ ދަލީލެކެވެ. އަޅުގަނޑު ނޫނަސް ކިތަންމެ ބަޔަކު، އެ މަނިކުފާނުގެ ކިބައިގައިވާ މާތް ސިފަތަކަށް ހެކިވެ، ތަޢުރީފުކުރެއެވެ.

އެއްދުވަހަކު، އަލްއަޚު ފަރެސް ޢާމިރު އަޅުގަނޑުގެ ގާތުގައި ވިދާޅުވިއެވެ. ދިވެހިރާއްޖޭގެ އަދީބުންނާއި ޅެންވެރިންގެ ތެރެއިން އެންމެ އަޚްލާޤު ރަނގަޅު ބޭފުޅަކީ، އާދަމް ނަޞީރު އިބްރާހީމެވެ. ޤަދަރުވެރި ޢިލްމުވެރި އެހެން ބޭފުޅަކު ވިދާޅުވިއެވެ. "މި ޖީލުގެ ޅެންވެރިންގެ ތެރެއިން އެންމެ މޮޅު ޅެންވެރިޔަކީ، އާދަމް ނަޞީރު އިބްރާހީމެވެ." ސުއްދަ ހުވަ އިސްދާނަ މަހާ ޢައްލާމާ އަލްއުސްތާޛު އިބްރާހީމް ރަޝީދު މޫސާ (حفظه الله)، އެ މަނިކުފާނާމެދު ހެޔޮ ބަސްފުޅު ވިދާޅުވެއެވެ. މި ނޫނަސް އެ މަނިކުފާނަށް ކުރެވޭ ތަޢުރީފުގެ ބަސްތައް އަޅުގަނޑަށް އަޑުއިވިފައި ވެއެވެ. އެ މަނިކުފާނަށް ވަޒީރުކަން ލިބިވަޑައިގަތުމުގެ މާ ކުރިންނެވެ.

އުސްތާޛު ނަޞީރާއެކު އެކިއެކި ކަންކަމުގައި އުޅުމުގެ ނަޞީބު އަޅުގަނޑަށް ލިބުނެވެ. އަޅުގަނޑަށް ފާހަގަކުރެވުނު ގޮތުގައި، އެ މަނިކުފާނަކީ ނުހަނު ތޫނު ބޭފުޅެކެވެ. އަޑު އިވިވަޑައިގަންނަވާ ކޮންމެ ޙިކުމަތެއް ހަނދުމަފުޅުގައި ބިންވަޅުނެގެއެވެ. އެ މަނިކުފާނަށް ޢަރަބި ބަސް މޭރުންވެވަޑައިގަތުމުގެ ސިއްރަކީ އެއީ ކަމަށް ބެލެވެއެވެ. އެ މަނިކުފާނު ކުރައްވާ ކޮންމެ ޢަމަލުފުޅެއްމެ، ނުހަނު ކަވިކޮށް، ނުހަނު ހިމުންކޮށް، ޙިކުމަތްތެރިކަމާއެކު ކުރެއްވޭތޯ ބައްލަވައެވެ.

އުސްތާޛު ނަޞީރަކީ ތަވާޟުޢުވެރިކަމުގައި ވެސް ލާމަސީލު ޙަކީމެކެވެ. ވަޒީފާގެ މައިދާނުގައި މަޤާމު ދަށްވެގެން ނުވަތަ މުސާރަ ކުޑަވެގެން ނުވަތަ ގޮނޑި ތިރިވެގެން ދުވަހަކުވެސް ޝަކުވާއެއް ނުކުރައްވައެވެ! މީހަކު އެފަދަ ޝަކުވާއެއް އުފެއްދިޔަސް، އެ މަނިކުފާނު އެ ކަމުން އެއްކިބާވެ ވަޑައިގަންނަވައެވެ! އެ މަނިކުފާނުގެ ކަންކަން ހުންނަ ގޮތާމެދު ވިސްނައިލެވޭ ބައެއް ފަހަރު ހިތަށް އަރައެވެ. ލުޤުމާނުލްޙަކީމުގެ ޙިކުމަތުގެ ގަނޑުވަރަށް ވަދެވުނު ހަމައެކަނި ދިވެއްސަކީ އެ މަނިކުފާނުތާއެވެ!!!

އުސްތާޛު ނަޞީރުގެ ޝުހުރަތު އެންމެ ބޮޑީ ޅެންވެރިކަމުގެ އާފާޤުގައެވެ. އެހެނަސް އެ މަނިކުފާނަކީ ބައެއް އެހެން ޢިލްމުތަކާއި ފަންނުތަކުގައި ވެސް ލާމަސީލު ބޭފުޅެކެވެ. އެ މަނިކުފާނަކީ ނުހަނު ރިވެތިކޮށް ކީރިތި ޤުރްއާން ކިޔަވާވިދާޅުވާ ޤާރީވެރިއެކެވެ. ދިވެހި ސަގާފަތާއި ދިވެހީންގެ ފަންނުތައް މޮޅަށް ދެނެވަޑައިގަންނަވާ ޚަބީރެކެވެ. ރާއްޖޭގެ އެތެރެވަރިއަށާއި ދުނިޔޭގެ ކަންކޮޅުތަކަށް ދުރުމީ އަޅުއްވާ މާލިމީއެކެވެ. އެ ކަންކަމުގެ ހެޔޮ އަސަރާއި ޙިކުމަތުޢަމަލީ، އެ މަނިކުފާނުގެ ދަރިވަރުންނަށް ވާރުތަކުރައްވައެވެ.

ދިވެހި އުންމަތުގެ މި ޖީލުގައި އުސްތާޛު ނަޞީރުގެ މަޤާމަކީ ކޮބައިތޯއެވެ؟ އެ މަނިކުފާނަކީ އުޖާލާ ޙިކުމަތުގެ ޝާޢިރެވެ. ފަހި ފަލްސަފާގެ އަމީރެވެ. ދިވެހި ޤައުމިއްޔަތުގެ ވަޒީރެވެ.

މާތްﷲ، އޮނަރަބްލް އާދަމް ނަޞީރު އިބްރާހީމްގެ ޙިކުމަތާއި ފަލްސަފާގައި ބަރަކާތް ލައްވާށިއެވެ! އެ މަނިކުފާނުގެ ޅެންވެރިކަމާއި އަދަބިއްޔާތަކީ، ދިވެހި ޅެންވެރިންނާއި އަދީބުންގެ ޤޫތުގެ ޔާޤޫތު ކަމުގައި ލައްވާށިއެވެ! އާމީން.