ބަޙުރު

ޑރ. އަޙްމަދު އަންވަރަކީ ދިވެހިރާއްޖޭގެ މި ޒަމާނުގެ ތަޢުލީމުގެ މަހާ މުއައްސިސެކެވެ. ތަޢުލީމީ ދާއިރާގައި އެ މަނިކުފާނުގެ ޚިދުމަތުގެ ދިގު ސިލްސިލާ އަދިވެސް ގެތެމުންދަނީއެވެ. މި ރާއްޖޭގެ މި ޒަމާނުގެ ތަޢުލީމުގެ ތަރައްޤީގައި އެ މަނިކުފާނުގެ ޙިއްޞާ ވަރަށް ވެސް ބޮޑެވެ. މިނިސްޓްރީ އޮފް އެޑިޔުކޭޝަނާއި، ބައެއް މުހިންމު ތަޢުލީމީ އިދާރާތަކާއި މުއައްސަސާތަކުގައި އެ މަނިކުފާނު ޙިކުމަތުޢަމަލީގެ ބުރަދަން ބަރެވެ.

ޑރ. އަޙްމަދު އަންވަރު ނިސްބަތްވެ ވަޑައިގަންނަވަނީ، ރާއްޖޭގެ ގިނަ ޢިލްމުވެރިންނާއި، ގިނަ ޚިދުމަތްތެރިންނާއި، ގިނަ ޙިކުމަތްތެރިންގެ ޚާންދާނަށެވެ. އެ ޚާންދާނުގެ ކާބަފައިންނަކީ ރާއްޖެ ދުށް އެންމެ ޚިދުމަތްތެރި، އެންމެ ޢިލްމުވެރި، އެންމެ ޙިކުމަތްތެރި ބޭފުޅުންނެވެ. އެ ބޭފުޅުންގެ ތެރޭގައި މާތް ވަލީވެރިޔާ ޔޫސުފު ނާއިބާއި، އަލްޢައްލާމާ އިބްނުއްސުލްޠާނިލް މިޞްރީ ހިމެނިވަޑައިގަންނަވައެވެ.

ޑރ. އަޙްމަދު އަންވަރަކީ ކޮން ބޭފުޅެއްކަން އަޅުގަނޑަށް އެންމެ ފުރަތަމަ އެނގުނީ މޯލްޑިވްސް އެކްރެޑިޓޭޝަން ބޯޑުގެ އިދާރާއިންނެވެ. އެ ތަނުން އެ މަނިކުފާނުގެ ހެޔޮ ތަޢާރުފެއް ދެއްވީ ޑރ. ޢަބްދުލްޙަންނާނު ވަޙީދެވެ. އެއީ 2009 ވަނަ އަހަރެވެ. އޭގެ އަހަރުތަކެއް ފަހުން، އެ މަނިކުފާނުގެ އަރިއަހަށް އަޅުގަނޑު ފޮނުއްވެވީ، ދިވެހިރާއްޖޭގެ އިސްލާމީ ޔުނިވަރސިޓީގެ ރެޖިސްޓްރަރ އަލްއުސްތާޛު އަޙްމަދު ރައޫފެވެ. މި ދެ ބޭފުޅުންނަށް ނުހަނު އިޚުލާޞްތެރިކަމާއެކު ޝުކުރު ދަންނަވަމެވެ.

އަޅުގަނޑަށް އެނގުނު ގޮތުގައި، ޑރ. އަޙްމަދު އަންވަރަކީ "މަކާރިމުލްއަޚްލާޤް" ގެ ޙިކުމަތްތެރިއެކެވެ. އެ މަނިކުފާނުގެ ޚުލްޤުފުޅު މާތެވެ. ތަވާޟުޢުވެރިކަން ބޮޑެވެ. ވިސްނުންފުޅު ތަނަވަހެވެ. މުޢާމަލާތުކުރެއްވުން ދީލައްޗެވެ. ދޫދެއްވުން ލާމަސީލެވެ. އެ މަނިކުފާނާ ބައްދަލުވާ ކޮންމެ މީހަކުމެ، އެ މަނިކުފާނަށް ނިހާއީ އިޙްތިރާމުން އިޙްތިރާމުކުރާނެއެވެ.

އެ މަނިކުފާނުގެ ހެޔޮ ޢަމަލުފުޅުތަކުގެ ތެރޭގައި ކީރިތި ޤުރްއާން ތަދައްބުރުކުރެއްވުމާއި، ނަބަވީ ސުންނަތް ދިރާސާކުރެއްވުން ހިމެނެއެވެ. އެ މަނިކުފާނު ކީރިތި ޤުރްއާން ކިޔަވާވިދާޅުވަނީ، ތަދައްބުރުގެ އުސްލޫބުންނެވެ. އެ ކަމަށް ޓަކައި ގެންގުޅުއްވާ ނޯޓު ފޮތެއް ދުށީމެވެ. ކީރިތި ޤުރްއާނުގެ މޫރިތި އާޔަތްތަކުގެ ފުން މާނަތައް އޭގައި ލިޔުއްވަމުން ގެންދަވައެވެ. އެ މަނިކުފާނު އެ ކަން ކުރައްވާހައި ފުރިހަމައަށް، އެ ކަން ކުރާ އެހެން ޚަލްޤަކު ދުވަހަކުވެސް ނުދެކެމެވެ.

ދެންނެވުމުގެ ބޭނުމެއް ނެތް ފަދައިން، ވިލާ ކޮލެޖުގެ ކުރިއެރުމާއި ތަރައްޤީގެ މޭސްތެރިއަކީ ޑރ. އަޙްމަދު އަންވަރެވެ. ރާއްޖޭގެ މަތީ ތަޢުލީމުގެ އެހެން މުއައްސަސާތަކަށް ގިނަ ދަރިވަރުން ފުރަގަސްދެމުންދާއިރު، ވިލާ ކޮލެޖު ވަނީ ދަރިވަރުންނާއިގެން ބަރާވެފައެވެ. އެ ކަމުގެ ސިއްރަކީ އެ މަނިކުފާނާއި އެ މަނިކުފާނުގެ ޓީމުން، އެކަޑެމިކް ކަންކަން ރާއްވަވާ ގޮތުގެ ފުރިހަމަކަމެވެ. ދަރިވަރުންނަށް ދެއްވާ އަހައްމިއްޔަތުގެ ބޮޑުކަމެވެ. ޒަމާނާއި ޙާލަތާ ގުޅޭނެހެން މިޞްރާބުކުރެއްވުމުގެ ސީދާކަމެވެ.

މާތްﷲ، ޑރ. އަޙްމަދު އަންވަރުގެ ޢުމުރުފުޅު ދަންމަވައި، އެ މަނިކުފާނަށް ދެ ދުނިޔޭގެ ނަޞްރާއި ނަޞީބާއި ކާމިޔާބު މިންވަރުކުރައްވާށިއެވެ! އަދި އެ މަނިކުފާނުގެ ޙިކުމަތްތެރި ލީޑަރޝިޕްގައި ވިލާ ކޮލެޖަކީ ރާއްޖޭގެ އެންމެ މަޤުބޫލު އެއްވަނަ ޔުނިވަރސިޓީ ކަމުގައި ލައްވާށިއެވެ! އާމީން.