އަލްމަސްޖިދުލް އަޤުޞާ
މުޞަންނިފު: ޢަބްދުލްމުޢީދު ޙަސަން
ތާރީޚު: 10 ފެބްރުވަރީ 2008
މުސްލިމުންގެ ތެރެއިން ގިނަ ބަޔަކަށް
މަސްޖިދުލް އަޤުޞާ އަކީ ކޮބައިކަމެއް
ނޭނގެއެވެ. މަސްޖިދުލް އަޤުޞާ އަކީ،
ޤުއްބަތުއް ޞަޚުރާ ކަމަށް ބައެއް މީހުން
ހީކުރެއެވެ. އަދި މަސްޖިދުލް އަޤުޞާއަކީ،
އަލްމަސްޖިދުލް ޤިބްލީ ކަމަށް ވެސް ބައެއް
މީހުން ހީކުރެއެވެ.
ޙަޤީޤަތުގައި
އަލްމަސްޖިދުލްއަޤުޞާއަކީ، ޤުދުސްގެ ބޯދާ
ރަށުތެރޭގައި ވަށައިގެން ފާރުލެވިފައިވާ
ސަރަޙައްދެވެ. އެ ސަރަޙައްދުގެ އިމުގެ
ތެރޭގައިވާ ކޮންމެ ތަނަކީ، އަލްމަސްޖިދުލް
އަޤުޞާގެ ތަނެކެވެ. މަތީގައިވާ ފޮޓޯއިން
ފެންނަ ވަށައިގެން ފާރު ލެވިފައިވާ، ހަނި
ދިގުކޮށް އޮތް ބިމަކީ، އަލްމަސްޖިދުލް
އަޤުޞާއެވެ. ޤުއްބަތުއް ޞަޚުރާ އެވަނީ، އެ
ބިމުގެ މެދެއްހައި ހިސާބުގައެވެ. އެ ބިމުގެ
ވާތްފަރާތުގެ އިންފާރާ ގުޅިފައިވާ މިސްކިތަކީ
އަލްމަސްޖިދުލް ޤިބްލީއެވެ.
އަލްމަސްޖިދުލް ޤިބްލީ
ބިނާކުރެވިފައި ވަނީ، މަސްޖިދުލް އަޤުޞާގައި
ޢުމަރުގެފާނު ނަމާދުފުޅު ކުރެއްވި ތަނުގައެވެ.
އެކަލޭގެފާނު އެތާނގައި ނަމާދުފުޅުކުރެއްވީ،
ހިޖުރައިން 15 ވަނަ އަހަރު، ޤުދުސް
ފަތަޙަކުރެއްވުމަށްފަހުގައެވެ.
އަލްމަސްޖިދުލް ޤިބްލީ ބިނާކުރައްވަން
ފެށްޓެވީ، ޚަލީފާ ޢަބްދުލްމަލިކު ބްނު
މަރްވާނެވެ. އެ މިސްކިތް ބިނާކުރައްވައި
ނިންމެވީ އޭނާގެ ދަރިކަލުން އަލްވަލީދު ބްނު
ޢަބްދުލްމަލިކެވެ. އެ މިސްކިތް
މަޝްހޫރުވެފައިވަނީ، އަލްޖާމިޢުލް ޤިބްލީގެ
ނަމުންނެވެ. މަސްޖިދުލް އަޤުޞާގައި ފިރިހެނުން
ނަމާދުކުރާ މައި ތަނަކީ އެ މިސްކިތެވެ.
ފިހުރިސްތު