ބިންގާ ގަނބައިގަތުމުގެ މައްސަލަ
ޢިމާރާތެއްގެ ބިންގާ ނުވަތަ ފައުންޑޭޝަނަށް
ގަނބައިގަތުމުގެ މައްސަލައާމެދު ނުހަނު
ފަރުވާތެރިވާންޖެހެއެވެ. އެ މައްސަލަ
ކުރިމަތިވެފައިވާކަން ދެނެގަނެވޭނެ
ޢަލާމާތްތަކެއް ވެއެވެ. ޢިމާރާތެއް
ގަންނައިރު، އެ މައްސަލައާމެދު ވަރަށް ބޮޑަށް
ސަމާލުވާންޖެހެއެވެ.
ޢިމާރާތެއް ނުވަތަ
ގެއެއް ނުވަތަ އެޕާޓްމަންޓެއް ގަތުމުގެ ކުރިން
ބަލަންޖެހޭ ކަންތައްތަކެއް ވެއެވެ. ގަތުމުގެ
އަގުގެ އިތުރަށް ކުރަންޖެހިދާނެ ޚަރަދުތަކެއް
ވޭތޯ ބަލަންޖެހެއެވެ. މަރާމާތުކުރަންޖެހޭތޯ
އާއި އިސްލާހުކުރަންޖެހޭ ކަމެއް ވޭތޯ
ބަލަންޖެހެއެވެ. އެފަދަ ކޮންމެ ކަމަކަށް
ހިނގާނެ ޚަރަދަކީ ކޮބައިތޯ ވެސް
ބަލަންޖެހެއެވެ. ބަލަންޖެހޭ ކަންތައްތަކުގެ
ތެރެއިން އެންމެ މުހިންމު އެއް ކަމަކީ،
ބިންގަލަށް ނުވަތަ ފައުންޑޭޝަނަށް
މައްސަލައެއް ޖެހިފައިވޭތޯ ބެލުމެވެ.
ޢިމާރާތެއްގެ ބިންގަލަށް ކުރިމަތިވާ އެންމެ
ނުރައްކާތެރި އެއް މައްސަލައަކީ
ގަނބައިގަތުމުގެ މައްސަލައެވެ. އެ މައްސަލަ
ކުރިމަތިވެފައި ވާނަމަ، އެކަން އެނގޭނެ
ޢަލާމާތްތަކެއް ވެއެވެ. އެއިން ބައެއް
ޢަލާމާތްތައް ތިރީގައި މިވަނީއެވެ.
1.
ފާރުތަކުގައި އެކި ގޮތްގޮތަށް
ރެނދުއަޅާފައިވުން: މީގެތެރޭގައި، އޮލަނބަށާއި
ރަހައަށާއި ކައްޗަށް ރެނދުއެޅުން ހިމެނެއެވެ.
2. ދޮރުތަކާއި ކުޑަދޮރުތައް
ގަނބައިގެންފައިވުން: ދޮރުތައް ހުޅުވައި
ލައްޕާއިރު ތާށިވުމަކީ މިކަމުގެ ޢަލާމާތެއް
ކަމުގައި ވެދާނެއެވެ.
3. ދޮރުތަކާއި
ކުޑަދޮރުތަކުގެ ވަށައިގެން ފާރުގައި
ރެނދުލާފައިވުން.
4. ތަޅުމުގައި
ރެނދުލާފައިވުމާއި، ތަޅުމުގެ އެކިއެކި
ބައިތައް އެއްވަރުނުވުން.
5. ގޯތިތެރޭގައި
ގެއާ ގުޅިފައިވާ ބިމުގެ ތަންތަން
ގަނަބައިގެންފައިވުން.
ޢިމާރާތުގެ
ބިންގާ ގަނބައިގެންފައިވާކަން ދެނެގަނެވިދާނެ
މިފަދަ ޢަލާމާތްތައް ވެއެވެ.
ޢިމާރާތުގެ
ބިންގާ ގަނބައިގަތުމުގެ މައްސަލައަށް އޮތް
އައްވަލު ޙައްލަކީ، އެ މައްސަލަ
ކުރިމަތިވުމަށް މެދުވެރިވާ ސަބަބުތައް
އެއްކިބާކުރުމެވެ. އެފަދަ ސަބަބުތަކުގެ
ތެރޭގައި އަންނަނިވި ކަންތައްތައް ހިމެނެއެވެ.
1. ޢިމާރާތްކުރުމަށް އެކަށީގެންނުވާ
ފަސްގަނޑެއް އޮތް ބިމެއްގައި ޢިމާރާތްކުރުން.
2. ޢިމާރާތްކުރުމަށްޓަކައި
ތައްޔާރުކުރެވިފައިވާ ސޮއިލް ރިޕޯޓުގައި
ބުނެފައިވާ ކަންކަން ނުކުރުން.
3.
ފަރުމާކުރުމުގައި ކުށް ހުރުން.
4. ޢިމާރާތް
ބިނާކުރުމުގައި ފަރުވާކުޑަކުރެވިފައިވުން.
5. ޢިމާރާތް ހުރި ތަނުން ފެން ނެގުމާއި
އެތަނަށް ފެން ހިނދުމުގެ މައްސަލަތަކެއް
ކުރިމަތިވެފައިވުން.
6. ފުނަށް މޫ ފައިބާ
ގަސްތަކެއް، ޢިމާރާތާ ކައިރީގައި ހުރުން.
7. ޢިމާރާތް ފަރުމާކުރެވިފައިވާ
އުސްމިނަށްވުރެ އިތުރަށް އުސްކުރުން.
8.
ޤުދުރަތީ ކާރިސާއަކަށް ހުށަހެޅިފައިވުން.
9. ވާރޭފެނުން އަސަރުކުރާހައި ތިލައިގައި
ބިންގާ އެޅިފައިވުން.
10. ފައުންޑޭޝަން
އެޅުމަށްޓަކައި ކޮންނަންޖެހޭ ފުންމިނަށް
ކޮނެފައި ނެތުން.
11. ފައުންޑޭޝަން
އެޅުމުގެ ކުރިން ބިން ހަރުކުރުމަށްޓަކައި
ކުރަންޖެހޭ ކަންކަން ރަނގަޅަށް ކުރެވިފައި
ނެތުން.
12. ޢިމާރާތާ ކައިރީގައި އެހެން
ޢިމާރާތެއް އެޅުމަށްޓަކައި ކޮނުމުން އެކަމުގެ
ނޭދެވޭ އަސަރު ކޮށްފައިވުން.
މިއީ،
ޢިމާރާތުގެ ބިންގާ ގަނބައިގަތުމަށް މެދުވެރިވާ
ބައެއް ސަބަބުތަކެވެ. ޢިމާރާތުގެ ސަލާމަތާއި
ރައްކާތެރިކަމަށްޓަކައި މިފަދަ ކަންތައްތަކުން
އެއްކިބާވުމަކީ، އެންމެ އެކަށޭނަ ޙައްލެވެ.
މަޞްދަރު:
https://www.handasa.xyz/2020/03/blog-post_8.html
ފިހުރިސްތު