ބަޙުރު

ކީރިތި ޤުރުއާނުގައި، އެއްހާސް އަހަރާ އެއްފަދަ ދުވަހެއްގެ ވާހަކަ ބަޔާންކުރައްވާފައިވާ އެއް އާޔަތަކީ، އައްސަޖްދާ ސޫރަތުގެ 5 ވަނަ އާޔަތެވެ. އެ އާޔަތުގައި ބަޔާންކުރައްވާފައިވާ ދުވަހުގެ ދިގުމިނާއި، އެ ދުވަހުގައި ހިނގާ ކަންކަން ދެނެގަތުމާބެހޭ އެއް މަފުހޫމަށްވުރެ ގިނަ މަފުހޫމު ވެއެވެ. މި މަޒުމޫނުގައި އަލިއަޅުވައިލާނީ އެއިން މަފުހޫމަކަށެވެ.

މާތް ﷲ ވަޙީކުރައްވާފައި ވެއެވެ.
(يُدَبِّرُ الْأَمْرَ مِنَ السَّمَاءِ إِلَى الْأَرْضِ ثُمَّ يَعْرُجُ إِلَيْهِ فِي يَوْمٍ كَانَ مِقْدَارُهُ أَلْفَ سَنَةٍ مِّمَّا تَعُدُّونَ) އައްސަޖްދާ: 5

މާނައީ، "އުޑުން ފެށިގެން ބިމާ ހަމަޔަށް ހުރިހާ ކަމެއް އެކަލާނގެ ތަދުބީރުކުރައްވަތެވެ. ދެން ތިޔަބައިމީހުން ގުނާގޮތުން އެއްހާސް އަހަރުގެ މިންވަރުގެ ދުވަހެއްގައި، އެ ހުރިހާ ކަމެއް އެކަލާނގެ ޙަޟުރަތަށް އަރައިގެންދެއެވެ."

މި އާޔަތުގައި، މާތް ﷲ ބަޔާންކުރައްވާފައި ވަނީ، އިންސާނުން މި ދުނިޔޭގައި ގުނައިއުޅޭ އަހަރުތަކުގެ ވާހަކައެވެ. އަންގަވާފައި އެވަނީ، ދުނިޔޭގައި ހިނގާ ކަންކަން އެކަލާނގެ ޙަޟުރަތަށް އަރައިގެން ދިއުމަށްޓަކައި ހޭދަވަނީ އެފަދަ އަހަރުން ގުނާނަމަ، އެއްހާސް އަހަރުގެ ދިގުމިނުގެ ދުވަހެއްގައި ކަމަށެވެ. އެއީ، ހަނދުމަހުގެ އަހަރެވެ. އެހެނީ، ޤަދީމީ ޒަމާނުއްސުރެ ޢަރަބީން އަހަރު ބަލައިއުޅުނީ ހަނދުމަހުގެ އަހަރުންނެވެ. މި އާޔަތުގައި ބަޔާންކުރައްވާފައިވާ އެއް ހާސް އަހަރުގެ ދިގުމިން ހޯދުމުގެ ފިޔަވަޅުތައް ތިރީގައި މިވަނީއެވެ. މި ފިޔަވަޅުތައް ލިޔެވޭތޯ މަސައްކަތްކޮށްފައިވާނީ، ޢިލްމީ ލަފުޒާއި ޢިބާރާތް އެއްފަރާތްކޮށް، އާންމުންނަށް ދޭހަވާނެ ފަދަ ތިލަ އުސްލޫބަކުންނެވެ.

ބިމުގެ ވަށައިގެން ހަނދު ދައުރެއް ފުރިހަމަކުރަނީ، އެއް މަސްދުވަހުންނެވެ. އެ މުއްދަތުގެ ތެރޭގައި ހަނދު ކަޑައްތުކުރާ ރާސްތާގެ ދިގުމިނަކީ ގާތްގަނޑަކަށް، 2152612.269 ކިލޯމީޓަރެވެ.

1 އަހަރުދުވަހަކީ، 12 މަސްދުވަހެވެ. 12 މަސްދުވަހުގެ ތެރޭގައި ހަނދު ކަޑައްތުކުރާ ރާސްތާ ހިސާބުކުރުމަށްޓަކައި، 12 އާ 2152612.269 ގުނަކުރުމުން ލިބޭ ނަތީޖާއަކީ، 25831347.228 ކިލޯމީޓަރެވެ. މިއީ، އެއް އަހަރުދުވަހުގެ ތެރޭގައި ހަނދު ކަޑައްތުކުރާ ރާސްތާގެ ދިގުމިނެވެ.

ދެން 1000 އަހަރުދުވަހުގެ މުއްދަތުގެ ތެރޭގައި، ހަނދު ކަޑައްތުކުރާ ރާސްތާގެ ދިގުމިން ހޯދުމަށްޓަކައި 1000 އާ 25831347.228 މި ޢަދަދު ގުނަކުރުމުން ލިބޭ ނަތީޖާއަކީ، 25831347228 ކިލޯމީޓަރެވެ. މިއީ، އެއް ހާސް އަހަރުދުވަހުގެ ތެރޭގައި ހަނދު ކަޑައްތުކުރާ ރާސްތާގެ ދިގުމިނެވެ.

ދެން ބޭނުންވާނީ ދުވަހެއްގެ ދިގުމިނެވެ. އެންމެ ތިލަކޮށް ބުނާނަމަ، ދުނިޔޭގެ ދުވަހަކީ، ދުނިޔެ އޭގެ ނާރެހުގެ ވަށައިގެން އެއްބުރު ފުރިހަމަކުރުމަށްޓަކައި ހޭދަވާ ވަގުތެވެ. އެ ވަގުތު އެތައް ގޮތަކަށް ހިސާބުކުރެވެއެވެ. އެހެންކަމުން، އެކިއެކި މަޞްދަރުތަކުގައި ދުނިޔޭގެ ދުވަހެއްގެ ދިގުމިން ބަޔާންކޮށްދޭ ޢަދަދުތައް ތަފާތެވެ. ނަމަވެސް އެ ޢަދަދުތަކުގެ މެދުގައި ވަނީ ވަރަށް ކުޑަ ފަރަގެކެވެ. އާތު ސައިންސް (Earth Science) އެވެ، ކިޔާ ފޮތުގައި ބަޔާންކޮށްފައިވާ، ދުނިޔޭގެ ދުވަހެއްގެ ދިގުމިނަކީ، 86164.098903691 ސިކުންތެވެ. މި ޢަދަދަކީ، ދުނިޔޭގެ ނިސްބަތުން ބަލާއިރު ޙާޞިލުވާ ދުވަހެއްގެ ދިގުމިނާ މާބޮޑު ފަރަގެއްވާ ޢަދަދެއް ނޫނެވެ. އެހެނީ، 23 ގަޑިއާއި، 56 މިނެޓާއި، 4.09053083288 ސިކުންތަކީ، 86164.09053083288 ސިކުންތެވެ.

ސްޕީޑް ބަޔާންކޮށްދޭ މަޝްހޫރު މާދަލާ ބުނާ ގޮތުގައި، އެއްޗެއް ދަތުރުކުރާ ސްޕީޑް ލިބެނީ، އެ އެއްޗެއް ކަޑައްތުކުރާ ރާސްތާ، އެ ރާސްތާ ކަޑައްތުކުރުމަށް ހޭދަވާ ވަގުތުން ގެއްލީމައެވެ. މި މާދަލާ ބޭނުންކޮށްގެން، ދުނިޔޭގެ ބިމުން މާތް ﷲ ގެ ޙަޟުރަތަށް ހުރިހައި ކަމެއް އަރައިގެންދާ ސްޕީޑް ހިސާބުކުރި ގޮތް ތިރީގައި މިވަނީއެވެ.

ސްޕީޑް = ރާސްތާ / ވަގުތު

ސްޕީޑް = 25831347228 / 86164.098903691 = 299792.460622646 ކިލޯމީޓަރ/ސިކުންތު

މިޢަދަދުގެ ޑެސިމަލް ޕޮއިންޓްގެ ފަހަތަށް އެއް ޢަދަދު އޮންނަ ވަރަށް ކުޑަކޮށްލާއިރު ޙާޞިލުވާ ނަތީޖާއަކީ، ސިކުންތަކު 299792.5 ކިލޯމީޓަރެވެ. އެންސައިކްލޮޕީޑިއާ ބްރިޓެނިކާ ފަދަ އިތުބާރުހުރި މަޞްދަރުތަކުގައި ބުނެފައިވަނީ، އަލި ދަތުރުކުރާ ބާރުމިނަކީ ސިކުންތަކު 299792.458 ކިލޯމީޓަރު ކަމަށެވެ. މި ޢަދަދު ވެސް ޑެސިމަލް ޕޮއިންޓްގެ ފަހަތަށް އެއް ޢަދަދު އޮންނަ ވަރަށް ކުޑަކޮށްލާއިރު ޙާޞިލުވާ ނަތީޖާއަކީ ސިކުންތަކު 299792.5 ކިލޯމީޓަރެވެ.

ލޮބުވެތި ކިޔުންތެރިންނޭވެ! މި މަޒުމޫނުގައި މި ގެނެސްދިނީ، އައްސަޖްދާ ސޫރަތުގެ 5 ވަނަ އާޔަތުގެ ޖައުހަރުގައި، އަލި ދަތުރުކުރާ ބާރުމިން ހިމަނުއްވާފައިވާ ކަމަށް ބުނާ މަފުހޫމުގެ ޚުލާޞާއެކެވެ. މި މަފުހޫމުގެ ނަޒަރުން ބަލާއިރު، އެ އާޔަތުގައި ހިމަނުއްވާފައިވާ ދުވެލީގެ ބާރުމިން، އަލި ދަތުރުކުރާ ބާރުމިނާ އެއްވަރެވެ. ނަމަވެސް އަލި ދަތުރުކުރާ ބާރުމިނަކީ، ކީރިތި ނަބިއްޔާ ޞައްލަ ﷲ ޢަލައިހި ވަސައްލަމަ ގެ ޒަމާނުގައި އެނގިފައިވާ އެއްޗެއް ނޫނެވެ. އެއީ، މިޒަމާނުގެ ސައިންސްގެ އަލީގައި ދާދިފަހުން ކަށަވަރުވި އެއްޗެކެވެ. އެހެންކަމުން، މި މަޒުމޫނުގައި ގެނެސްދެވުނު މަފުހޫމުގެ ނަޒަރުން ބަލާއިރު، އައްސަޖްދާ ސޫރަތުގެ 5 ވަނަ އާޔަތުގައި ވަނީ، އިޢުޖާޒެއް ކަމަށް ޤުރުއާނާއި ސައިންސްގެ ބައެއް ޢިލްމުވެރިން ޤަބޫލުކުރައްވައެވެ. މާތް ﷲ ގެ ވާގިފުޅާއެކު، މިނޫން އެހެން މަފުހޫމަކަށް އެހެން މަޒުމޫނެއްގައި އަލިއަޅުވައިލުމުގެ އުންމީދުގައި، މި މަޒުމޫނު މިހިސާބަށް ނިންމައިލަމެވެ.