ބަޙުރު

ނޫޙުގެފާނު އެކަލޭގެފާނުގެ ޤައުމުގެ މީހުންގެ ތެރޭގައި ދީނަށް ގޮވައިލެއްވި މުއްދަތު، އަލްޢަންކަބޫތު ސޫރަތުގެ 14 ވަނަ އާޔަތުގައި ބަޔާންކުރައްވާފައިވެއެވެ. ތިރީގައި މިވަނީ އެ އާޔަތެވެ.

(وَلَقَدْ أَرْسَلْنَا نُوحًا إِلَىٰ قَوْمِهِ فَلَبِثَ فِيهِمْ أَلْفَ سَنَةٍ إِلَّا خَمْسِينَ عَامًا فَأَخَذَهُمُ الطُّوفَانُ وَهُمْ ظَالِمُونَ)

މާނައީ، "ހަމަކަށަވަރުން ތިމަންރަސްކަލާނގެ ނޫޙުގެފާނު، އެކަލޭގެފާނުގެ ޤައުމުގެ މީހުންގެ ގާތަށް ރަސޫލުކަމާއިގެން ފޮނުއްވީމެވެ. ފަހެ، އެކަލޭގެފާނު، ފަންސާސް އަހަރު ފިޔަވައި، އެއްހާސް އަހަރު (އެބަހީ: ނުވަސަތޭކަ ފަންސާސް އަހަރު ދީނަށް ގޮވައިލެއްވުމަށް) އެއުރެންގެ ތެރޭގައި ހުންނެވިއެވެ. ފަހެ، އެއުރެން އަނިޔާވެރިން ކަމުގައިވާ ޙާލު، ޠޫފާނު (ގެ ޢަޛާބު) އައިސް އެއުރެންނަށް ޖެހުނެވެ."

މި އާޔަތުގައި ބަޔާންކުރައްވާފައިވާ މި ޙަޤީޤަތް، ޢިލްމީ އިޢުޖާޒެއްގެ ސިފައިގައި، ކީރިތި ޤުރުއާނުގެ އެހެން ސޫރަތެއްގެ ތެރެއިން ފާހަގަކުރެވެއެވެ. އެއީ ކީރިތި ޤުރުއާނުގެ 71 ވަނަ ސޫރަތެވެ. އެއީ ނޫޙު ސޫރަތެވެ. އެ ސޫރަތަށް ނަންދެއްވާފައިވަނީ، ނޫޙުގެފާނުގެ ނަންފުޅުންނެވެ. އެ ސޫރަތުގައި އެކަލޭގެފާނުގެ ނަންފުޅު ބަޔާންކުރައްވާފައިވަނީ ތިން އާޔަތެއްގައެވެ. އެއިން ކޮންމެ އާޔަތެއްގައި އެ ނަންފުޅު ބަޔާންކުރައްވާފައިވަނީ އެއްފަހަރުއެވެ. އެއީ، ފުރަތަމަ އާޔަތާއި، އެކާވީސް ވަނަ އާޔަތާއި، ސައްބީސް ވަނަ އާޔަތެވެ. އެ ސޫރަތުގެ ތެރެއިން ފާހަގަކޮށްލެވޭ އާދަޔާ ޚިލާފު ކަމަކީ، އެންމެ ތިންފަހަރު ނޫނީ އެ ސޫރަތުގައި (ح) ނެތް ކަމެވެ. އަދި އެ ތިން ފަހަރު، ތަކުރާރުވެފައިވާ (ح) އަކީ އެކަލޭގެފާނުގެ ނަންފުޅުގައިވާ (ح) ކަމެވެ!

ނޫޙު ސޫރަތުގައިވާ އަކުރުތަކުގެ ޢަދަދު ގުނައި ހިސާބުކުރާއިރު، މިދެންނެވި ނުކުތާގެ މުހިންމުކަން ހާމަވެއެވެ. އެ ސޫރަތުގެ އާޔަތްތަކުގައިވާ އަކުރުތަކުގެ ޖުމުލަ ޢަދަދަކީ، 953 އެވެ. އެ ސޫރަތުގައިވާ (ح) ތަކުރާރުވެފައިވާ ޢަދަދު 953 އިން ކެނޑީމާ ލިބޭ ނަތީޖާއަކީ، 950 އެވެ! މި ޢަދަދު ތަމްސީލުކުރަނީ، ނޫޙުގެފާނު އެކަލޭގެފާނުގެ ޤައުމުގެ މީހުންގެ ތެރޭގައި ދީނަށް ގޮވައިލެއްވި މުއްދަތެވެ! އެއީ، 950 އަހަރެވެ.

ކީރިތި ޤުރުއާނުގެ މި އިޢުޖާޒާމެދު ފިކުރު ހިންގައިލުމުން ހާމަވާ އެތައް ކަންތައްތަކެއް ވެއެވެ. އެއިން އެއްކަމަކީ، ކީރިތި ޤުރުއާނުގެ އަކުރުތަކުގެ ޢަދަދުގައި ވެސް ޙިކުމަތްތައް ލައްވާފައިވާ ކަމެވެ. އަނެއް ކަމަކީ، ކީރިތި ޤުރުއާނުގެ އެކިއެކި ބައިތައް، އެއްގޮތަށްވުރެ ގިނަ ގޮތްގޮތުން ގުޅިލާމެހިފައިވާ ކަމެވެ. އާދޭހެވެ. އަލްޢަންކަބޫތު ސޫރަތުގެ 14 ވަނަ އާޔަތުގައި ބަޔާންކުރައްވާފައިވާ ޙަޤީޤަތެއް އެވަނީ، ނޫޙު ސޫރަތާ ގުޅިލާމެހިފައެވެ. މިކަމަކީ، ކީރިތި ޤުރުއާން ބާވައިލެއްވި ޒަމާނުގައި އެއްވެސް މީހަކަށް މިހައި ފުރިހަމަކަށް ކުރެވޭ ވަރަށްވުރެ މާބޮޑު ކަމެކެވެ. އެހެންކަމުން، ކީރިތި ޤުރުއާނަކީ، މާތް ﷲ ބާވައިލައްވާފައިވާ ފޮތެއްކަން މި ޙަޤީޤަތުން ވެސް އެބަ ހާމަވެއެވެ.