ހުވަފެނުގެ ތަޢުބީރު
ލޯބިވެރިންގެ ދުވަހު ހެނދުނު ނިދިން ހޭލުމަށްފަހު،
ފިރިމީހާގެ ގާތުގައި އަނބިމީހާ ބުންޏެވެ.
"ރޭގައި
ތިމަންނާއަށް ހުވަފެނުން ފެނުނީ އަލިމަހުން ޖަރީކޮށްފައިވާ
ރަންހާރެއް، ތިބާ ތިމަންނާއަށް ގެނެސްދިން މަންޒަރެވެ. މި
ހުވަފެނުގެ ތަޢުބީރަކީ ކޮބައިހެއްޔެވެ؟"
ފިރިމީހާ
ބުންޏެވެ.
"މިއަދު ހަވީރު ތިބާއަށް ތިޔަ ހުވަފެނުގެ
ތަޢުބީރު އެނގޭނެއެވެ."
އެދުވަހު ހަވީރު ފިރިމީހާ
ގެއަށް އައީ، ވަރަށް ރީތި ކުޑަކުޑަ ފޮށްޓެއް
ހިފައިގެންނެވެ. އެ ފޮށީގެ ބޭރުގައި ވަނީ، ވިދާ އެއްޗެހި
ތަތްކޮށްފައެވެ. އެ ފޮށި ފެނުމުން އަނބިމީހާގެ
ހިތަށްއެރިއެވެ. އޭގެތެރޭގައިވާނީ ތިމަންނާއަށް ހުވަފެނުން
ފެނުނު ހާރުތާއެވެ!
ފިރިމީހާ އައިސް އަނބިމީހާގެ
އަތަށް އެ ފޮށި ދިއްކޮށްލަމުން ބުންޏެވެ.
"މިއީ
ލޯބިވެރިންގެ ދުވަހު، ތިމަންނާ ތިބާއަށް ދޭ ހަދިޔާއެވެ!"
އަނބިމީހާ އެ ފޮށި ހުޅުވާލިއިރު އޭގެ ތެރޭގައި އޮތީ
ފޮތެކެވެ. ފޮތުގެ ނަމަކީ، "ހުވަފެން ތަޢުބީރު" އެވެ!