ބަޙުރު

ކޮކާ:
ޞަބާޙުލްޚައިރި އޭ އުޚުތާ!
ތިބާއީ ގަހުގެ ޒީނަތްތާ!
ވިދާހެން މޫނު ބެބުޅީތާ!
އެއީ ޝަބްނަމް ވެހޭތީތާ!
ތިބާ ޗާލޭ! ތިބާ ފަރިއޭ!
ތިބާ ޗާލޭ! ތިބާ ފަރިއޭ!

މާ:
ޞަބާޙުއްނޫރި ވަލްޚައިރީ،
ސަލާމްކުރަމުން ހުވަނދު ފެތުރީ،
ޢަޖާއިބުތައް ބަލަންމެ ހުރީ،
މަލެއް ނޫން ހޭ؟ ހިތަށް މިއެރީ!
ޖަވާބެއްދީ! ނަޖާކޮށްދީ!
ޖަވާބެއްދީ! ނަޖާކޮށްދީ!

ކޮކާ:
މަލެއްހެން އުދުހެމޭ އުހުގައި،
ފަތެއްހެން އިންނަމޭ ގަހުގައި،
މަލަށް ބޮސްދީ އަރާމެއްގައި،
ކުރަން ވަސްމީރު ވާދީގައި،
ނިކަން ގައިމޭ! އެ ކަން ލޯތްބޭ!
ނިކަން ގައިމޭ! އެ ކަން ލޯތްބޭ!

މާ:
ފިޔައިން އުދުހުމުގެ ނިޢުމަތަކީ،
ތިބާޔަށް ދެއްވި ރަޙުމަތެކޭ،
މަލުން ބޮއިގެން! ރަޙީޤުތަކާ،
ހިފައިގެން ދޭ ސަލާމުތަކާ،
އަލުން އާދޭ! ބަލަން އާދޭ!
އަލުން އާދޭ! ބަލަން އާދޭ!