ދެއަތް ބަނދެގެން ހުންނާށެވެ!
ރަމަޟާންމަހުގެ ދުވަހެއްގައި ޢަޞްރު ނަމާދަށްފަހު،
ފަތުވާދެއްވަން މިސްކިތުގައި އިންނެވި ފިޤުހުވެރިއެއްގެ
އަރިހުގައި މީހަކު ދެންނެވިއެވެ.
"ޝައިޚާ އެވެ! މި ދިޔަ ރަމަޟާން މަހުގެ ތިމަންނާގެ
ރޯދައެއް ވަނީ ގެއްލިފައެވެ!"
ފިޤުހުވެރިޔާ: އެ ދުވަހުގެ ބަދަލުގައި އެހެން ދުވަހަކު، އެ
ރޯދަ ޤަޟާކުރާށެވެ!
އެމީހާ: ތިމަންނާ އެރޯދަ ޤަޟާކުރުމުގެ ނިޔަތުގައި
އެއްދުވަހަކު ރޯދަހިފީމެވެ. ނަމަވެސް އެ ދުވަހު މެންދުރު
ނަމާދުކޮށްގެން ގެއަށް ދިޔައިރު، ގޭގައި އުޅެނީ
ބޮނޑިބަތާއި ކުޅިމަސް ކައްކައިގެންނެވެ. ދެން އެ ނުކައި
ނުހުރެވިގެން ބަނޑުފުރެންދެން ކެއީމެވެ!
ފިޤުހުވެރިޔާ: އެ ދުވަހުގެ ބަދަލުގައި އެހެން ދުވަހަކު، އެ
ރޯދަ ޤަޟާކުރާށެވެ!
އެމީހާ: އަނެއްކާވެސް އެހެން ދުވަހަކު އެ ރޯދަ ޤަޟާކުރަން
އުޅުނީމެވެ. ނަމަވެސް އެ ދުވަހު މެންދުރު ނަމާދުކޮށްގެން
ގެއަށް ދިޔައިރު، ގޭގައި ވަނީ ބިރިޔާނީ ކައްކާފައެވެ. ދެން
އެ ނުކައި ނުހުރެވިގެން ބަނޑުފުރެންދެން ކެއީމެވެ!
ފިޤުހުވެރިޔާ: ދެން އެ ރޯދަ ޤަޟާކުރާ ދުވަހަކު ދެއަތް
ބަނދެގެން ހުންނާށެވެ!